പട്ടികവർഗ വിദ്യാർഥികൾക്കായി 'കൂടെ' പദ്ധതി; സമഗ്ര റിപ്പോർട്ട് വിദ്യാഭ്യാസ മന്ത്രിക്ക് കൈമാറി

​സുൽത്താൻബത്തേരി: സുൽത്താൻബത്തേരി നിയോജകമണ്ഡലത്തിലെ പട്ടികവർഗ വിദ്യാർഥികൾക്ക് ഹയർസെക്കൻഡറി വിദ്യാഭ്യാസം പൂർണ്ണമായി ഉറപ്പാക്കുന്നതിനായി ഐ.സി. ബാലകൃഷ്‌ണൻ എം.എൽ.എ. ആവിഷ്കരിച്ച 'കൂടെ' പദ്ധതിയുടെ സമഗ്ര റിപ്പോർട്ട് വിദ്യാഭ്യാസ മന്ത്രി എൻ. ഷംസുദ്ദീന് സമർപ്പിച്ചു. ഐ.സി. ബാലകൃഷ്ണൻ എം.എൽ.എ. നേരിട്ടാണ് റിപ്പോർട്ട് മന്ത്രിക്ക് കൈമാറിയത്.

​ജില്ലയിലെ പട്ടികവർഗ വിദ്യാർഥികൾ പ്ലസ് വൺ പ്രവേശനം മുതൽ നേരിടുന്ന വെല്ലുവിളികൾ, പഠനം മുടങ്ങാനുള്ള സാമ്പത്തിക-സാമൂഹിക കാരണങ്ങൾ, ഹോസ്റ്റൽ-യാത്രാ സൗകര്യങ്ങളുടെ കുറവ്, അക്കാദമിക പിന്തുണയുടെ അഭാവം എന്നിവ റിപ്പോർട്ടിൽ വിശദമായി പ്രതിപാദിക്കുന്നുണ്ട്. പട്ടികവർഗ കുട്ടികളെ കണ്ടെത്തി പ്രവേശനം ഉറപ്പാക്കാനും, പഠനം പാതിവഴിയിൽ ഉപേക്ഷിക്കുന്നത് തടയാനും ആവശ്യമായ ദീർഘകാല പ്രായോഗിക നിർദേശങ്ങളും റിപ്പോർട്ടിലുണ്ട്.

​റിപ്പോർട്ട് സ്വീകരിച്ച മന്ത്രി നിർദേശങ്ങൾ പരിശോധിച്ച് ആവശ്യമായ തുടർനടപടികൾ സ്വീകരിക്കുമെന്ന് ഉറപ്പുനൽകി. സംസ്ഥാനതലത്തിൽ ഇത്തരം മാതൃകാ ഇടപെടലുകൾ വ്യാപിപ്പിക്കുന്നതിനുള്ള വഴികളും റിപ്പോർട്ടിൽ സൂചിപ്പിച്ചിട്ടുണ്ട്. ചടങ്ങിൽ അമ്പലവയൽ പഞ്ചായത്ത് പ്രസിഡന്റ് എൻ.സി. കൃഷ്ണകുമാർ, പദ്ധതി കോഡിനേറ്റർ ഷിവി കൃഷ്ണൻ എന്നിവരും പങ്കെടുത്തു.