കക്കയം ഡാമിൽ ജലനിരപ്പ് 97.76 ശതമാനത്തിലെത്തി; ഷട്ടറുകൾ തുറന്നു

പേരാമ്പ്ര : കെ.എസ്.ഇ.ബി.യുടെ കുറ്റ്യാടി ജലവൈദ്യുതപദ്ധതിയുടെ ഭാഗമായ കക്കയം ഡാമിൽ ജലനിരപ്പ് ഉയർന്നതോടെ റിസർവോയറിൽ 97.76 ശതമാനം വെള്ളമായി. 33.98 ദശലക്ഷം ക്യുബിക് മീറ്റർ (എം.സി.എം) സംഭരണശേഷിയുള്ള ഡാമിൽ നിലവിൽ 33.22 എം.സി.എം. വെള്ളമുണ്ട്. 758.04 മീറ്റർ പരമാവധി ജലനിരപ്പുള്ള ഡാമിൽ തിങ്കളാഴ്ചത്തെ അളവുപ്രകാരം 757.73 മീറ്ററാണ് ജലനിരപ്പ്.

​റെഡ് അലർട്ട് പരിധിയായ 757.50 മീറ്റർ പിന്നിട്ടതിനെത്തുടർന്ന് ഞായറാഴ്ച രാത്രി ഡാമിന്റെ രണ്ട് ഷട്ടറുകൾ കാൽ അടി വീതം തുറന്നു. സെക്കൻഡിൽ 12.97 ക്യുബിക് മീറ്റർ വെള്ളമാണ് പുറത്തേക്ക് ഒഴുക്കിവിടുന്നത്. ഈ വെള്ളം പെരുവണ്ണാമൂഴി ഡാം റിസർവോയറിലേക്കാണ് എത്തുന്നത്.

​കുറ്റ്യാടി ജലസേചനപദ്ധതിയുടെ ഭാഗമായ പെരുവണ്ണാമുഴി ഡാമിൽ നാല് ഷട്ടറുകളും തുറന്ന് കുറ്റ്യാടിപ്പുഴയിലേക്ക് സെക്കൻഡിൽ 111.39 ക്യൂബിക് മീറ്റർ വെള്ളം ഒഴുക്കിവിടുന്നുണ്ട്. 105.69 എം.സി.എം. സംഭരണശേഷിയുള്ള പെരുവണ്ണാമൂഴിയിൽ നിലവിൽ 75.57 എം.സി.എം. (60 ശതമാനം) വെള്ളമുണ്ട്. 42.7 മീറ്റർ പുനർനിശ്ചയിച്ച സംഭരണപരിധിയുള്ള ഡാമിൽ 39.28 മീറ്ററാണ് തിങ്കളാഴ്ച രേഖപ്പെടുത്തിയ ജലനിരപ്പ്.