​കനത്ത മഴയിൽ വെള്ളിപറമ്പിൽ വീട് തകർന്നു; ഉറക്കത്തിനിടെ ശബ്ദം കേട്ട് ഓടിയതിനാൽ ദുരന്തമൊഴിവായി

കോഴിക്കോട്: മെഡിക്കൽ കോളേജിന് സമീപം വെള്ളിപറമ്പിൽ പുലർച്ചെയുണ്ടായ ശക്തമായ മഴയിൽ വീട് തകർന്നു വീണു. വെള്ളിപറമ്പ് സ്വദേശിയും ഓട്ടോറിക്ഷ തൊഴിലാളിയുമായ നൗഷാദിന്റെ വീടിന്റെ അടുക്കള, ബാത്റൂം, വർക്ക് ഏരിയ എന്നിവയാണ് പൂർണ്ണമായും തകർന്നത്. പുലർച്ചെ മൂന്ന് മണിയോടെയായിരുന്നു സംഭവം. ഈ സമയം വലിയൊരു ഉഗ്രശബ്ദം കേട്ട് വീട്ടിലുണ്ടായിരുന്ന നാലംഗ കുടുംബം പെട്ടെന്ന് തന്നെ സിറ്റ്‌ഔട്ടിന്റെ ഭാഗത്തേക്ക് ഓടി മാറിയതിനാലാണ് വൻ ദുരന്തവും ആളപായവും ഒഴിവായത്.

​അപകടത്തിൽ വീട്ടുപകരണങ്ങൾ പൂർണ്ണമായും മണ്ണിൽ പുതഞ്ഞ നിലയിലാണ്. വീടിന് അടിയിലുള്ള മണ്ണ് ഇടിഞ്ഞു താഴേക്ക് പോകുന്നതിനാൽ കെട്ടിടത്തിന്റെ ബാക്കി ഭാഗങ്ങളും ഇപ്പോൾ കടുത്ത അപകടഭീഷണിയിലാണ്. ഇനിയും മഴ ശക്തമായാൽ വീട് പൂർണ്ണമായും തകർന്നു വീഴുമെന്ന ആശങ്കയിലാണ് കുടുംബം. ഇതിന് പുറമെ തൊട്ടടുത്ത വീടിന്റെ മതിലിനോട് ചേർന്നുള്ള ഭാഗവും ഇടിഞ്ഞു വീണിട്ടുണ്ട്. വിവരമറിഞ്ഞ് വാർഡ് മെമ്പറും റവന്യൂ ഉദ്യോഗസ്ഥരും സ്ഥലത്തെത്തി സ്ഥിതിഗതികൾ വിലയിരുത്തി.