രമേശൻ പാലേരിക്ക് വടകരയുടെ ശ്രദ്ധാഞ്ജലി

വടകര മുനിസിപ്പൽ ചെയർമാൻ പി. കെ. ശശി അധ്യക്ഷനായ ചടങ്ങ് എം.എൽ.എ കെ. കെ. രമ ഉദ്ഘാടനം ചെയ്തു. അധ്വാനത്തിന്റെയും സത്യസന്ധതയുടെയും സാമൂഹിക പ്രതിബദ്ധതയുടെയും പ്രതീകമായിരുന്നു രമേശൻ പാലേരിയെന്നും, സഹകരണ പ്രസ്ഥാനത്തെ ജനകീയമാക്കുന്നതിൽ അദ്ദേഹം വഹിച്ച പങ്ക് എന്നും സ്മരിക്കപ്പെടുമെന്നും പ്രഭാഷകർ പറഞ്ഞു. വ്യക്തിപരമായ ലാളിത്യവും പൊതുകാര്യങ്ങളോടുള്ള ആത്മാർഥതയും അദ്ദേഹത്തെ വേറിട്ട നേതാവാക്കിയെന്നും അവർ അനുസ്മരിച്ചു.

സ്റ്റാൻഡിങ് കമ്മിറ്റി ചെയർമാൻ പി. കെ. സതീശൻ, സി. ഭാസ്കരൻ മാസ്റ്റർ, സോമൻ മുതുവന, പി. പി. ദാമോദരൻ മാസ്റ്റർ, പി. സോമശേഖരൻ, വാർഡ് കൗൺസിലർ ബിജു കുമാർ, പി. പിരാജൻ, മണലിൽ മോഹനൻ, വി. പി. രമേശൻ, പപ്പൻ നരിപ്പറ്റ, എടയത്ത് ശ്രീധരൻ, അടിയേരി രവീന്ദ്രൻ, സുഗുണേഷ് കുറ്റിയിൽ, കായക്ക രാജൻ, വിനോദ് ചെറിയത്ത്, കെ. പി. രാജീവൻ, സി. കെ. സുധീർകുമാർ, കെ. എം. ബാലകൃഷ്ണൻ, മുസ്തഫ മുട്ടുങ്ങൽ, അജിത്ത് പാലയാട് എന്നിവർ സംസാരിച്ചു.

രമേശൻ പാലേരിയുടെ പൊതുജീവിതവും സഹകരണ മേഖലയിലെ കാഴ്ചപ്പാടുകളും ജനങ്ങളുമായി അദ്ദേഹം പുലർത്തിയ ആത്മബന്ധവും അനുസ്മരണ പ്രഭാഷണങ്ങളിൽ ആവർത്തിച്ച് ഉയർന്നുവന്നു. അദ്ദേഹത്തിന്റെ നിര്യാണം വടകരയ്ക്കും മലബാറിലെ സഹകരണ പ്രസ്ഥാനത്തിനും നികത്താനാവാത്ത നഷ്ടമാണെന്ന് വിവിധ വക്താക്കൾ അഭിപ്രായപ്പെട്ടു.

ടി. ശ്രീനിവാസൻ സ്വാഗതവും പറമ്പത്ത് രവീന്ദ്രൻ നന്ദിയും രേഖപ്പെടുത്തി. ചടങ്ങിൽ പങ്കെടുത്തവർ മൗനാചരണത്തിലൂടെ പ്രിയ നേതാവിന്റെ സ്മരണയ്ക്ക് ആദരമർപ്പിച്ചു.