നിയന്ത്രണംവിട്ട ബസ് മേൽപ്പാലത്തിലിടിച്ചു; 28 പേർക്ക് പരിക്ക്

കോഴിക്കോട്: നിയന്ത്രണംവിട്ട സിറ്റി ബസ് മേൽപ്പാലത്തിലിടിച്ച് യാത്രക്കാരായ 28 പേർക്ക് പരിക്കേറ്റു. ബുധനാഴ്ച രാവിലെ ഫ്രാൻസിസ് റോഡിലായിരുന്നു അപകടം സംഭവിച്ചത്. പരിക്കേറ്റവർ ഉടൻ തന്നെ സമീപത്തെ സ്വകാര്യ ആശുപത്രിയിൽ ചികിത്സതേടി. ആരുടെയും പരിക്ക് ഗുരുതരമല്ലെന്ന് ചെമ്മങ്ങാട് പോലീസ് അറിയിച്ചു. കരുവൻതിരുത്തി-മെഡിക്കൽ കോളേജ് റൂട്ടിലോടുന്ന സിറ്റി ബസാണ് അപകടത്തിൽപ്പെട്ടത്.

​ബസിന്റെ സ്റ്റിയറിങ് റാഡ് പൊട്ടിയതിനെത്തുടർന്ന് നിയന്ത്രണംവിട്ട് മേൽപ്പാലത്തിന്റെ സ്‌പാനിൽ ഇടിക്കുകയായിരുന്നു. ഈ ബസിന് തൊട്ടുമുന്നിൽ സഞ്ചരിച്ച മറ്റൊരു ബസിന്റെ ബ്രേക്ക് തകരാറായതിനെത്തുടർന്ന്, അതിലുണ്ടായിരുന്ന യാത്രക്കാരെക്കൂടി ഈ ബസിലേക്ക് കയറ്റിയിരുന്നു. അതുകൊണ്ടാണ് അപകടസമയത്ത് ബസിൽ ഇത്രയധികം യാത്രക്കാരുണ്ടാകാൻ കാരണം.