സഹകരണ പ്രസ്ഥാനത്തിന്റെ കരുത്തൻ രമേശ് പാലേരിക്ക് കണ്ണീരോടെ വിട

വടകര: സംസ്ഥാന സഹകരണ പ്രസ്ഥാനത്തിന്റെ ശക്തനായ നേതാവും ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റി (ULCCS) ചെയർമാനുമായിരുന്ന രമേശ് പാലേരിക്ക് ജന്മനാട് കണ്ണീരോടെ അന്ത്യാഞ്ജലി അർപ്പിച്ചു. നാദാപുരം റോഡിലെ വസതിയിൽ ബുധനാഴ്ച വൻ ജനാവലിയുടെ സാന്നിധ്യത്തിലായിരുന്നു സംസ്കാര ചടങ്ങുകൾ.

ചൊവ്വാഴ്ച രാവിലെ 8.30-ഓടെ കോയമ്പത്തൂരിലെ ആശുപത്രിയിൽ അന്തരിച്ച രമേശ് പാലേരിയുടെ ഭൗതികദേഹം തുടർന്ന് കോഴിക്കോട് യു.എൽ.സി.സി.എസ് സൈബർ പാർക്ക്, കോഴിക്കോട് ടൗൺഹാൾ, വടകര ടൗൺഹാൾ, നാദാപുരം റോഡിലെ യു.എൽ.സി.സി.എസ് ആസ്ഥാനം എന്നിവിടങ്ങളിൽ പൊതുദർശനത്തിന് വെച്ചു. രാത്രി വൈകിയാണ് ഭൗതികദേഹം വസതിയിലെത്തിച്ചത്.

പുലർച്ചെ മുതൽ സമൂഹത്തിന്റെ നാനാതുറകളിൽപ്പെട്ടവരും യു.എൽ.സി.സി.എസ് ജീവനക്കാരും അനുബന്ധ സ്ഥാപനങ്ങളിലെ ജീവനക്കാരും ജനപ്രതിനിധികളും സാമൂഹിക, രാഷ്ട്രീയ, സാംസ്കാരിക രംഗത്തെ പ്രമുഖരും സഹകാരികളും ഉൾപ്പെടെ ആയിരങ്ങളാണ് അന്ത്യാഞ്ജലി അർപ്പിക്കാൻ എത്തിയത്. സംസ്കാര ചടങ്ങിൽ പങ്കെടുക്കാനെത്തിയവർക്ക് പ്രത്യേക പാർക്കിംഗ് സൗകര്യം ചോമ്പാല പോലീസും യു.എൽ.സി.സി.എസ് ജീവനക്കാരും ചേർന്ന് ഒരുക്കിയിരുന്നു.

രാഷ്ട്രീയ, സാമൂഹിക, സാംസ്കാരിക രംഗത്തെ നിരവധി പ്രമുഖർ രമേശ് പാലേരിക്ക് ആദരാഞ്ജലി അർപ്പിച്ചു. സി.പി.എം സംസ്ഥാന സെക്രട്ടറി എം.വി. ഗോവിന്ദൻ, മുൻ കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രൻ, മന്ത്രിമാരായ പി.എ. മുഹമ്മദ് റിയാസ്, തോമസ് ഐസക്, എ.കെ. ബാലൻ, കടന്നപ്പള്ളി രാമചന്ദ്രൻ, എൽ.ഡി.എഫ് കൺവീനർ ടി.പി. രാമകൃഷ്ണൻ, മുസ്ലിം ലീഗ് സംസ്ഥാന പ്രസിഡന്റ് സാദിഖലി ശിഹാബ് തങ്ങൾ, സി.പി.ഐ സംസ്ഥാന സെക്രട്ടറി ബിനോയ് വിശ്വം, എം.എൽ.എമാരായ കെ.കെ. രമ, പാറക്കൽ അബ്ദുള്ള, നടി രേവതി, സാഹിത്യകാരൻ എം. മുകുന്ദൻ തുടങ്ങി വിവിധ മേഖലകളിലെ പ്രമുഖർ അനുശോചനം രേഖപ്പെടുത്തി.

തുടർന്ന് യു.എൽ.സി.സി.എസ് ഹാളിൽ ചേർന്ന സർവകക്ഷി അനുശോചനയോഗത്തിൽ കെ.കെ. രമ എം.എൽ.എ അധ്യക്ഷത വഹിച്ചു. ടി.പി. രാമകൃഷ്ണൻ, പി. മോഹനൻ മാസ്റ്റർ, പി. സതീദേവി, മനയത്ത് ചന്ദ്രൻ, കോട്ടയിൽ രാധാകൃഷ്ണൻ, എൻ. വേണു, സത്യൻ മൊകേരി, ടി.പി. ബിനീഷ്, അഡ്വ. കെ. ദിലീപ് കുമാർ, പി.പി. ജാഫർ, പറമ്പത്ത് പ്രഭാകരൻ, പി. സത്യനാഥ്, പി. സോമശേഖരൻ, കെ.എം. സത്യൻ എന്നിവർ സംസാരിച്ചു.

സഹകരണ പ്രസ്ഥാനത്തിന് പുതിയ ദിശാബോധം നൽകിയ ഭരണനേതാവിനെയാണ് നഷ്ടമായതെന്നും, രമേശ് പാലേരിയുടെ പ്രവർത്തനമികവും നേതൃത്വപാടവവും വരുംതലമുറകൾക്ക് പ്രചോദനമായി തുടരുമെന്നും അനുശോചനയോഗത്തിൽ സംസാരിച്ചവർ അഭിപ്രായപ്പെട്ടു.