ഏഷ്യയിലെ ഏറ്റവും വലിയ സഹകരണ സ്ഥാപനത്തിന്റെ ശില്പി രമേശൻ പാലേരി വിടവാങ്ങി: വറ്റാത്തത് ലക്ഷക്കണക്കിന് മനുഷ്യരുടെ തീരാനഷ്ടം

 വടകര : ഊരാളുങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റി (യുഎൽസിസിഎസ്) ചെയർമാൻ രമേശൻ പാലേരി (66) അന്തരിച്ചു. അസുഖബാധിതനായി കോയമ്പത്തൂരിലെ സ്വകാര്യ ആശുപത്രിയിൽ ചികിത്സയിലിരിക്കെ ചൊവ്വാഴ്ച രാവിലെ 8.30-ഓടെയായിരുന്നു അന്ത്യം.

രമേശൻ പാലേരി എന്ന മഹദ്‌വ്യക്തിയുടെ വേർപാട് ഒരു കുടുംബത്തിന്റെയോ ഒരു ദേശത്തിന്റെയോ മാത്രം നഷ്ടമല്ല. ഏഷ്യയിലെ ഏറ്റവും വലിയ സഹകരണ പ്രസ്ഥാനത്തെ നെഞ്ചിലേറ്റിയ എണ്ണമറ്റ ജീവനക്കാരുടെയും, ആ മഹത് പ്രസ്ഥാനത്തെ ആശ്രയിച്ച് ജീവിക്കുന്ന ലക്ഷക്കണക്കിന് മനുഷ്യരുടെയും വറ്റാത്ത തീരാനഷ്ടമാണ് ഇല്ലാതാകുന്നത്.

31 വർഷത്തെ അതുല്യമായ നേതൃത്വം

1984-ൽ ഒരു ഓവർസിയറായാണ് രമേശൻ പാലേരി യു.എൽ.സി.സി.എസിൽ പ്രവൃത്തിപഥത്തിൽ എത്തുന്നത്. തുടർന്ന് 1995-ൽ സൊസൈറ്റിയുടെ പ്രസിഡന്റായി തിരഞ്ഞെടുക്കപ്പെടുകയും പിന്നീട് ചെയർമാനായി ചുമതലയേൽക്കുകയുമായിരുന്നു. തുടർച്ചയായി 31 വർഷം സൊസൈറ്റിയെ വിജയകരമായി നയിച്ച അദ്ദേഹത്തിന്റെ കാലഘട്ടത്തിലാണ് യു.എൽ.സി.സി.എസ് ആധുനികവത്കരണത്തിലേക്കും വൈവിധ്യവത്കരണത്തിലേക്കും ചുവടുവെച്ചത്.

അദ്ദേഹത്തിന്റെ ദൂരക്കാഴ്ചയിലാണ് സൊസൈറ്റി ഏഷ്യയിലെ ഏറ്റവും വലിയതും, ലോകത്തെ രണ്ടാമത്തെയും വലിയ ലേബർ കോ-ഓപ്പറേറ്റീവ് സൊസൈറ്റിയായി വളർന്നു പന്തലിച്ചത്.

നാടിന്റെ വികസന നായകൻ

നിർമാണരംഗത്ത് ഏറ്റവും ആധുനിക സാങ്കേതികവിദ്യകൾ അവതരിപ്പിച്ച അദ്ദേഹം ഐ.ടി, ടൂറിസം, ഹൗസിങ്, കൃഷി, സ്പേസ് ക്ലബ്ബ്, വിദ്യാഭ്യാസം, സാമൂഹിക സുരക്ഷ തുടങ്ങിയ വൈവിധ്യമാർന്ന മേഖലകളിലേക്ക് സൊസൈറ്റിയുടെ പ്രവർത്തനം വ്യാപിപ്പിച്ചു. 1,600 കോടി രൂപ ചെലവിൽ പൂർത്തിയാക്കിയ തലപ്പാടി-ചെങ്കള ദേശീയപാതാ നവീകരണം ഉൾപ്പെടെയുള്ള വൻകിട വികസന പദ്ധതികൾ അദ്ദേഹത്തിന്റെ ദീർഘവീക്ഷണത്തിന് തെളിവാണ്.

സഹകരണ-സാമൂഹിക മേഖലകളിലെ മികച്ച സേവനത്തിന് സംസ്ഥാന സർക്കാരിന്റെ റോബർട്ട് ഓവൻ പുരസ്‌കാരം, ഇ. നാരായണൻ പുരസ്‌കാരം, ഇസാഫിന്റെ സോഷ്യൽ ബിസിനസ് അവാർഡ്, ബഹ്റൈൻ കേരളീയ സമാജത്തിന്റെ സംഘശക്തി പുരസ്‌കാരം, അരങ്ങിൽ ശ്രീധരൻ പുരസ്‌കാരം, ഇന്ദിരാഗാന്ധി സദ്ഭാവനാ പുരസ്‌കാരം തുടങ്ങി നിരവധിയായ പുരസ്കാരങ്ങൾ നൽകി നാട് അദ്ദേഹത്തെ ആദരിച്ചിട്ടുണ്ട്.

സംസ്കാരം ബുധനാഴ്ച

പൊതുജനങ്ങൾക്ക് ആദരാഞ്ജലികൾ അർപ്പിക്കുന്നതിനായി ചൊവ്വാഴ്ച വൈകിട്ട് മൂന്ന് മണിക്ക് കോഴിക്കോട് ടൗൺ ഹോളിലും, വൈകിട്ട് 6.30-ന് വടകര ടൗൺ ഹോളിലും, രാത്രി 8.30-ന് യുഎൽസിസിഎസ് ആസ്ഥാനത്തും മൃതദേഹം പൊതുദർശനത്തിന് വെക്കും.

തുടർന്ന് ബുധനാഴ്ച രാവിലെ 11 മണിക്ക് നാദാപുരം റോഡിലെ വീട്ടുവളപ്പിൽ സംസ്കാരം നടക്കും.