മാതാപിതാക്കളുടെ സിബിൽ സ്കോർ മോശമെങ്കിൽ മക്കൾക്ക് വിദ്യാഭ്യാസ വായ്പ ലഭിക്കില്ലെന്ന് ഹൈക്കോടതി

​കൊച്ചി: മാതാപിതാക്കളുടെ സിബിൽ (CIBIL) സ്കോർ മോശമാണെങ്കിൽ മക്കൾക്ക് വിദ്യാഭ്യാസ വായ്പയ്ക്ക് അർഹതയുണ്ടാകില്ലെന്ന് ഹൈക്കോടതി. വിദ്യാഭ്യാസ വായ്‌പ നിഷേധിച്ച ബാങ്കുകളുടെ നടപടിക്കെതിരെ ഒരു കൂട്ടം ബിരുദ വിദ്യാർഥികൾ സമർപ്പിച്ച ഹർജികൾ തള്ളിക്കൊണ്ടാണ് ഹൈക്കോടതി സിംഗിൾ ബെഞ്ചിന്റെ നിർണായക ഉത്തരവ്. വിദ്യാഭ്യാസ വായ്പകൾ അനുവദിക്കുന്നതിൽ സഹ അപേക്ഷകരുടെ ക്രെഡിറ്റ് ഹിസ്റ്ററി പരിശോധിക്കേണ്ടത് അനിവാര്യമാണെന്നും, ബാങ്കുകളുടെ നടപടി പൂർണ്ണമായും നിയമപരമാണെന്നും കോടതി വ്യക്തമാക്കി. തങ്ങളുടെ രക്ഷിതാക്കളുടെ ക്രെഡിറ്റ് സ്കോർ കുറവാണെന്ന കാരണത്താൽ വായ്പ നിഷേധിക്കുന്നത് അന്യായമാണെന്ന വിദ്യാർഥികളുടെ വാദം തള്ളിയ കോടതി, വിദ്യാഭ്യാസ വായ്പ എന്നത് ഒരു വിദ്യാർഥിയുടെ മൗലികാവകാശമല്ലെന്നും നിരീക്ഷിച്ചു.