നിയമനം നടക്കുന്നില്ല; സെക്രട്ടേറിയറ്റിന് മുന്നിൽ 'മണ്ണ് തിന്ന്' എൽ.പി. സ്കൂൾ റാങ്ക് ഹോൾഡേഴ്സിന്റെ വേറിട്ട പ്രതിഷേധം

തിരുവനന്തപുരം: റാങ്ക് പട്ടിക പ്രസിദ്ധീകരിച്ച് ഒരു വർഷം പിന്നിട്ടിട്ടും നിയമനം നടക്കാത്തതിൽ പ്രതിഷേധിച്ച് എൽ.പി. സ്കൂൾ ടീച്ചർ റാങ്ക് ലിസ്റ്റിലുള്ള ഉദ്യോഗാർഥികൾ സെക്രട്ടേറിയറ്റിന് മുന്നിൽ പ്രതിഷേധാത്മകമായി മണ്ണ് തിന്ന് സമരം നടത്തി. ഇന്ന് രാവിലെ 11 മണിയോടെയാണ് ഉദ്യോഗാർഥികൾ തലസ്ഥാനത്ത് ഈ വേറിട്ട പ്രതിഷേധവുമായി എത്തിയത്. എൽ.ഡി.എഫ്. സർക്കാരിന്റെ അവസാന കാലഘട്ടത്തിലും സമാനമായ രീതിയിൽ ഉദ്യോഗാർഥികൾ ശക്തമായ പ്രതിഷേധവുമായി രംഗത്തിറങ്ങിയിരുന്നു.

​2025 മെയ് 31-ന് പി.എസ്.സി. പ്രസിദ്ധീകരിച്ച റാങ്ക് ലിസ്റ്റിൽ നിന്നും നിലവിൽ നടക്കുന്നത് നാമമാത്രമായ നിയമനങ്ങൾ മാത്രമാണെന്നാണ് ഉദ്യോഗാർഥികളുടെ പ്രധാന പരാതി. പല ജില്ലകളിലും റാങ്ക് ലിസ്റ്റിലെ ഒന്നാം സ്ഥാനക്കാർക്ക് പോലും ഇതുവരെ നിയമന ഉത്തരവ് ലഭിക്കാത്ത അത്രയും ദയനീയമായ അവസ്ഥയാണ് നിലവിലുള്ളതെന്നും അവർ ചൂണ്ടിക്കാട്ടുന്നു. ഒരു വർഷമായി തുടരുന്ന ഈ അനിശ്ചിതത്വത്തിന് അടിയന്തര പരിഹാരം കാണണമെന്നാണ് ഇവരുടെ ആവശ്യം.

​അധ്യാപക-വിദ്യാർഥി അനുപാതത്തിൽ മാറ്റം വരുത്തി പുനർനിർണയിക്കണമെന്നാണ് സമരക്കാരുടെ പ്രധാന ആവശ്യങ്ങളിലൊന്ന്. തസ്തിക നഷ്ടപ്പെടുന്ന (ഡിവിഷൻ ഫാൾ) അധ്യാപകരെ നിലവിലുള്ള പ്രധാനാധ്യാപക ഒഴിവുകളിലേക്ക് പുനർവിന്യസിക്കണമെന്നും, വിരമിക്കൽ മൂലമുണ്ടാകുന്ന ഒഴിവുകൾ കൃത്യമായി റിപ്പോർട്ട് ചെയ്ത് റാങ്ക് ലിസ്റ്റിലുള്ളവർക്ക് അടിയന്തരമായി നിയമനം നൽകണമെന്നും ഉദ്യോഗാർഥികൾ സർക്കാരിനോട് ആവശ്യപ്പെടുന്നു.