'മനുഷ്യത്വരഹിതം, അധ്യാപകൻ ഇങ്ങനെ ആണോ പ്രവർത്തിക്കേണ്ടത്'; ഡോ. റാമിന് തിരിച്ചടി, മുൻകൂർ ജാമ്യാപേക്ഷ തള്ളി സുപ്രീംകോടതി

ദില്ലി: കണ്ണൂർ അഞ്ചരക്കണ്ടി ദന്തൽ കോളേജിലെ വിദ്യാർത്ഥിയായ നിതിൻ രാജിന്റെ ആത്മഹത്യയുമായി ബന്ധപ്പെട്ട് ആരോപണവിധേയനായ അധ്യാപകൻ ഡോ. എം.കെ. റാമിന് സുപ്രീംകോടതിയിൽ നിന്ന് കനത്ത തിരിച്ചടി. പ്രതിയുടെ മുൻകൂർ ജാമ്യാപേക്ഷ സുപ്രീംകോടതി പൂർണ്ണമായും തള്ളി. ജസ്റ്റിസുമാരായ വിക്രംനാഥ്, സന്ദീപ് മേത്ത എന്നിവരടങ്ങിയ ബെഞ്ചാണ് ഹർജി പരിഗണിച്ചത്. ഡോ. റാമിന് മുൻകൂർ ജാമ്യം നിഷേധിച്ചുകൊണ്ടുള്ള ഹൈക്കോടതിയുടെ മുൻ ഉത്തരവ് സുപ്രീംകോടതി ഇതോടെ ശരിവെക്കുകയായിരുന്നു. ഹർജി പരിഗണിക്കുന്നതിനിടെ വിദ്യാർത്ഥികളോട് ഒരു അധ്യാപകൻ ഇത്തരത്തിലാണോ പെരുമാറേണ്ടതെന്ന് കോടതി റാമിന്റെ അഭിഭാഷകനോട് രൂക്ഷമായ ഭാഷയിൽ ചോദിച്ചു.

​ജാമ്യാപേക്ഷ തള്ളിയതിനൊപ്പം പ്രതിക്കെതിരെ അത്യന്തം കടുത്ത പരാമർശങ്ങളാണ് സുപ്രീംകോടതി നടത്തിയത്. വിദ്യാർത്ഥിയായ നിതിൻ രാജ് ക്ലാസ്മുറിക്കുള്ളിൽ വെച്ച് ക്രൂരമായി അധിക്ഷേപിക്കപ്പെട്ടു എന്നത് വ്യക്തമാണെന്ന് കോടതി നിരീക്ഷിച്ചു. സ്വന്തം സഹപാഠികളുടെ മുന്നിൽവെച്ച് ഇത്തരത്തിൽ മാനസികമായി തകർക്കപ്പെടുന്ന ഒരു വിദ്യാർത്ഥിയുടെ മാനസികാവസ്ഥയെക്കുറിച്ച് ചിന്തിച്ചിട്ടുണ്ടോയെന്നും, ഇത്തരം തരംതാണ പെരുമാറ്റങ്ങളിൽ നിന്ന് അധ്യാപകന് ഒഴിഞ്ഞുമാറാൻ കഴിയില്ലെന്നും കോടതി വ്യക്തമാക്കി. 'മനുഷ്യത്വരഹിതം' എന്ന വാക്ക് മാത്രമാണ് ഈ സംഭവത്തെക്കുറിച്ച് ഓർക്കുമ്പോൾ മനസ്സിൽ വരുന്നത് എന്നും, വിദ്യാർത്ഥികളോട് ക്രൂരത കാണിക്കുന്ന അധ്യാപകർ തങ്ങൾ ചെയ്യുന്ന പ്രവർത്തിയുടെ പ്രത്യാഘാതം എത്രത്തോളം വലുതാണെന്ന് മനസ്സിലാക്കണമെന്നും കോടതി ഓർമ്മിപ്പിച്ചു.

​അതേസമയം, ഡോ. റാം വിദ്യാർത്ഥിക്കെതിരെ ജാതി അധിക്ഷേപങ്ങൾ നടത്തിയിട്ടില്ലെന്നായിരുന്നു പ്രതിഭാഗം അഭിഭാഷകൻ കോടതിയിൽ വാദിച്ചത്. അധ്യാപകൻ തന്റെ ഭാഗത്തുനിന്നുണ്ടായ വീഴ്ചകളിൽ നിന്ന് പാഠം പഠിച്ചതായും അഭിഭാഷകൻ കോടതിയെ അറിയിച്ചു. എന്നാൽ, കേസിൽ പ്രതിയായ ഡോ. റാം കഴിഞ്ഞ മൂന്ന് മാസമായി പോലീസിനെ വെട്ടിച്ച് ഒളിവിലാണെന്ന് സംസ്ഥാന സർക്കാർ സുപ്രീംകോടതിയെ ഔദ്യോഗികമായി അറിയിക്കുകയായിരുന്നു. ഈ സാഹചര്യത്തിൽ മുൻകൂർ ജാമ്യം നൽകുന്നത് അന്വേഷണത്തെ ബാധിക്കുമെന്ന സർക്കാരിന്റെ വാദവും കോടതി കണക്കിലെടുത്തു.