ഓണം പ്രമാണിച്ച് കൂടുതൽ സ്പെഷ്യൽ ട്രെയിനുകൾ അനുവദിച്ച് റെയിൽവേ; റിസർവേഷൻ ആരംഭിച്ചു

തിരുവനന്തപുരം: ഓണക്കാലത്തെ കടുത്ത തിരക്ക് പരിഹരിക്കുന്നതിനായി കേരളത്തിലേക്ക് കൂടുതൽ സ്പെഷ്യൽ ട്രെയിനുകൾ അനുവദിച്ച് ഇന്ത്യൻ റെയിൽവേ. തിരുവനന്തപുരം നോർത്തിൽ നിന്ന് മംഗളൂരുവിലേക്കും, ചെന്നൈയിൽ നിന്ന് കൊല്ലത്തേക്കും, ബെംഗളൂരുവിൽ നിന്ന് എറണാകുളത്തേക്കുമാണ് പ്രത്യേക സർവീസുകൾ പ്രഖ്യാപിച്ചത്. ഈ ട്രെയിനുകളിലേക്കുള്ള ടിക്കറ്റ് റിസർവേഷൻ ശനിയാഴ്ച രാവിലെ 8 മണി മുതൽ ആരംഭിച്ചതായും അധികൃതർ അറിയിച്ചു.

​ചെന്നൈ സെൻട്രൽ - കൊല്ലം സ്പെഷ്യൽ (06117 / 06118)

​ഓഗസ്റ്റ് 13 മുതൽ സെപ്റ്റംബർ 5 വരെയുള്ള നിശ്ചിത ദിവസങ്ങളിലാണ് ഈ സർവീസ് ലഭ്യമാകുക. ചെന്നൈയിൽ നിന്നുള്ള ട്രെയിൻ (06117) ഓഗസ്റ്റ് 13, 15, 20, 22, 27, 29, സെപ്റ്റംബർ 3, 5 തീയതികളിൽ രാത്രി 11.50-ന് പുറപ്പെട്ട് പിറ്റേന്ന് വൈകിട്ട് 4.20-ന് കൊല്ലത്തെത്തും. തിരികെ കൊല്ലത്തുനിന്നുള്ള സർവീസ് (06118) ഓഗസ്റ്റ് 14, 16, 21, 23, 28, 30, സെപ്റ്റംബർ 4, 6 തീയതികളിൽ വൈകിട്ട് 6.45-ന് പുറപ്പെട്ട് പിറ്റേന്ന് രാവിലെ 11.35-ന് ചെന്നൈയിലെത്തും. ഒരു ഫസ്റ്റ് ക്ലാസ് കം എസി ടു ടയർ, രണ്ട് എസി ടു ടയർ, 13 സ്ലീപ്പർ, രണ്ട് ജനറൽ കോച്ചുകൾ എന്നിവയടങ്ങുന്ന ഈ ട്രെയിനിന് പെരമ്പൂർ, തിരുവള്ളൂർ, അരക്കോണം, കാട്പാഡി, ജോലാർപ്പേട്ട്, സേലം, ഈറോഡ്, തിരുപ്പൂർ, പോത്തന്നൂർ, പാലക്കാട്, തൃശ്ശൂർ, ആലുവ, എറണാകുളം ടൗൺ, കോട്ടയം, ചങ്ങനാശ്ശേരി, തിരുവല്ല, ചെങ്ങന്നൂർ, മാവേലിക്കര, കായംകുളം എന്നിവിടങ്ങളിലാണ് സ്റ്റോപ്പുകൾ അനുവദിച്ചിട്ടുള്ളത്.

​തിരുവനന്തപുരം നോർത്ത് - മംഗളൂരു ജങ്ഷൻ സ്പെഷ്യൽ (06093 / 06094)

​ഓഗസ്റ്റ് രണ്ടാം വാരം മുതൽ സെപ്റ്റംബർ ആദ്യവാരം വരെയുള്ള തിങ്കൾ, ചൊവ്വാ ദിവസങ്ങളിലാണ് ഈ പ്രത്യേക സർവീസ് നടക്കുക. തിരുവനന്തപുരത്തുനിന്നുള്ള ട്രെയിൻ (06093) ഓഗസ്റ്റ് 12, 19, 26, സെപ്റ്റംബർ 2 തീയതികളിൽ രാവിലെ 9.00-ന് പുറപ്പെട്ട് രാത്രി 9.00-ന് മംഗളൂരുവിലെത്തും. മംഗളൂരുവിൽ നിന്നുള്ള മടക്ക സർവീസ് (06094) ഓഗസ്റ്റ് 13, 20, 27, സെപ്റ്റംബർ 3 തീയതികളിൽ ഉച്ചയ്ക്ക് ശേഷം 3.15-ന് പുറപ്പെട്ട് പിറ്റേന്ന് രാവിലെ 5.30-ന് തിരുവനന്തപുരത്തെത്തും. വർക്കല, കൊല്ലം, കായംകുളം, മാവേലിക്കര, ചെങ്ങന്നൂർ, തിരുവല്ല, ചങ്ങനാശ്ശേരി, കോട്ടയം, എറണാകുളം ടൗൺ, ആലുവ, തൃശ്ശൂർ, ഷൊർണൂർ, തിരൂർ, കോഴിക്കോട്, വടകര, തലശ്ശേരി, കണ്ണൂർ, പയ്യന്നൂർ, കാഞ്ഞങ്ങാട്, കാസർകോട് എന്നിവയാണ് പ്രധാന സ്റ്റോപ്പുകൾ.

​ബെംഗളൂരു - എറണാകുളം സ്പെഷ്യൽ (06147 / 06148)

​ഐടി നഗരമായ ബെംഗളൂരുവിൽ നിന്നുള്ള മലയാളി യാത്രക്കാർക്ക് ഏറെ പ്രയോജനപ്പെടുന്നതാണ് ഈ സ്പെഷ്യൽ സർവീസുകൾ. എറണാകുളം - ബെംഗളൂരു എസ്എംവിടി എക്സ്പ്രസ് (06147) ഓഗസ്റ്റ് 9, 16, 23, 30, സെപ്റ്റംബർ 6 തീയതികളിൽ രാത്രി 11.10-ന് എറണാകുളത്തുനിന്ന് പുറപ്പെട്ട് അടുത്ത ദിവസം പകൽ 12.45-ന് ബെംഗളൂരുവിൽ എത്തും. ബെംഗളൂരു എസ്എംവിടി - എറണാകുളം എക്സ്പ്രസ് (06148) ഓഗസ്റ്റ് 10, 17, 24, 31, സെപ്റ്റംബർ 7 തീയതികളിൽ വൈകിട്ട് 4.00-ന് ബെംഗളൂരുവിൽ നിന്ന് പുറപ്പെട്ട് അടുത്ത ദിവസം രാവിലെ 5.45-ന് എറണാകുളത്തെത്തും. കെ.ആർ. പുരം, ബംഗാർപ്പേട്ട്,, സേലം, ഈറോഡ്, തിരുപ്പൂർ, പോത്തന്നൂർ, പാലക്കാട്, തൃശ്ശൂർ, ആലുവ എന്നിവിടങ്ങളിൽ ഈ ട്രെയിനുകൾക്ക് സ്റ്റോപ്പ് ഉണ്ടായിരിക്കും.