മലബാറിലെ വിദ്യാഭ്യാസ മുന്നേറ്റം ആശാവഹമെന്ന് പാണക്കാട് സാദിഖലി ശിഹാബ് തങ്ങൾ

പാറക്കടവ്: വിദ്യാഭ്യാസരംഗത്ത് പണ്ട് ഏറെ പിന്നിലായിരുന്ന മലബാർ മേഖലയിൽ ഇപ്പോൾ ദൃശ്യമാകുന്നത് വലിയ മുന്നേറ്റമാണെന്ന് മുസ്‌ലിംലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾ. പ്രത്യേകിച്ച് ഉന്നത വിദ്യാഭ്യാസ മേഖലകളിൽ പെൺകുട്ടികൾ ബഹുദൂരം മുന്നിലെത്തിക്കഴിഞ്ഞതായും അദ്ദേഹം അഭിപ്രായപ്പെട്ടു. നാദാപുരം ചെക്യാട് മലബാർ വിമെൻസ് കോളേജ് ക്യാമ്പസിന് സമീപം ആരംഭിക്കുന്ന വുഡ്‌ലം പാർക്ക് സ്കൂളിന്റെ പതിനഞ്ചാമത് ബ്രാഞ്ചിന്റെ ശിലാസ്ഥാപന കർമ്മം നിർവഹിച്ചു സംസാരിക്കുകയായിരുന്നു അദ്ദേഹം.

​ചടങ്ങിൽ മലബാർ ഫൗണ്ടേഷൻ ചെയർമാൻ സൂപ്പി നരിക്കാട്ടേരി അധ്യക്ഷത വഹിച്ചു. സ്കൂളിന്റെ പുതിയ ലോഗോ പ്രകാശനം കെ.എം. അഭിജിത്ത് എം.എൽ.എ. നിർവഹിച്ചു. ചടങ്ങിൽ വെച്ച് മാനേജിങ് ഡയറക്ടർ സിദ്ദീഖ് പാലോള്ളതിൽ സാദിഖലി ശിഹാബ് തങ്ങൾക്ക് ഉപഹാരം സമർപ്പിച്ചു.

​തൂണേരി ബ്ലോക്ക് പഞ്ചായത്ത് പ്രസിഡന്റ് കെ.പി. പ്രതീഷ്, സി.കെ. സുബൈർ, കോളേജ് പ്രിൻസിപ്പൽ ഡോക്ടർ ഷൈന ഷമീർ, നൗഫൽ അഹമ്മദ്, വയലോളി സഫിയ, വാർഡ് മെമ്പർ പി. റൈഹാനത്ത്, എം.കെ. അഷ്റഫ് തുടങ്ങിയ പ്രമുഖർ ചടങ്ങിൽ ആശംസകൾ അർപ്പിച്ചു സംസാരിച്ചു.