കോഴിക്കോട് റെയിൽവേ സ്റ്റേഷനിലെ ക്ലോക്ക് ടവർ അപകടം; അനാസ്ഥ അന്വേഷിക്കാൻ പ്രത്യേക സമിതിയെ നിയോഗിച്ചു

കോഴിക്കോട്: റെയിൽവേ സ്റ്റേഷനിലെ ചരിത്രപ്രസിദ്ധമായ ക്ലോക്ക് ടവർ തകർന്നുവീണ സംഭവത്തിൽ റെയിൽവേ പ്രത്യേക അന്വേഷണ സമിതിയെ നിയോഗിച്ചു. സീനിയർ ഡിവിഷണൽ സേഫ്റ്റി ഓഫീസർ ബെന്നി വർഗീസിന്റെ നേതൃത്വത്തിലുള്ള സമിതിയാണ് അപകടത്തെക്കുറിച്ച് വിശദമായ അന്വേഷണം നടത്തുക. വ്യാഴാഴ്ച രാവിലെ 11 മണിയോടെയായിരുന്നു സ്റ്റേഷനിലെ പൈതൃക ക്ലോക്ക് ടവറിന്റെ ഒരു ഭാഗം വൻ ശബ്ദത്തോടെ തകർന്നുവീണത്. അപകടത്തിൽ റെയിൽവേ അധികൃതരുടെ ഭാഗത്തുനിന്ന് ഗുരുതരമായ അനാസ്ഥ സംഭവിച്ചിട്ടുണ്ടെന്നാണ് പ്രാഥമിക വിലയിരുത്തൽ.

​ടവർ അപകടാവസ്ഥയിലാണെന്ന നിർണായകമായ മുന്നറിയിപ്പുകൾ അധികൃതർ പൂർണ്ണമായി അവഗണിച്ചതായി കണ്ടെത്തിയിട്ടുണ്ട്. നാല് മാസം മുൻപ് തന്നെ കെട്ടിടത്തിൽ വിള്ളലുകൾ പ്രത്യക്ഷപ്പെട്ടിരുന്നു. കെട്ടിടത്തിന്റെ താഴെ വരെ രണ്ട് സെന്റിമീറ്റർ വീതിയുള്ള വലിയ വിള്ളൽ കണ്ടെത്തിയതിനെ തുടർന്ന്, ഇത് കനത്ത അപകടഭീഷണിയാണെന്ന് മൂന്ന് മാസം മുൻപ് തന്നെ റിപ്പോർട്ട് ലഭിച്ചിരുന്നു. റെയിൽവേ അധികൃതർ ടവർ പൊളിച്ചുനീക്കാൻ 'റാങ്ക് കൺസ്ട്രക്ഷൻ' എന്ന നിർമ്മാണ കമ്പനിയെ ചുമതലപ്പെടുത്തിയെങ്കിലും സമയബന്ധിതമായി നടപടികൾ സ്വീകരിച്ചില്ല. നാല് ദിവസം മുൻപ് വീണ്ടും അടിയന്തര മുന്നറിയിപ്പ് നൽകിയിട്ടും അധികൃതർ നിസ്സംഗത തുടർന്നതാണ് 150 വർഷത്തോളം പഴക്കമുള്ള ഈ പൈതൃക സ്മാരകം തകരാൻ ഇടയാക്കിയത്.

​അതേസമയം, അപകടത്തെ തുടർന്ന് തകർന്നുവീണ ക്ലോക്ക് ടവറിന്റെ അവശിഷ്ടങ്ങൾ നീക്കം ചെയ്യുന്ന പ്രവൃത്തികൾ യുദ്ധകാലാടിസ്ഥാനത്തിൽ പുരോഗമിക്കുകയാണ്. സുരക്ഷ മുൻനിർത്തി നിലവിൽ ഘട്ടം ഘട്ടമായാണ് അവശേഷിക്കുന്ന കെട്ടിടഭാഗങ്ങൾ പൊളിച്ചുനീക്കുന്നത്. കെട്ടിടാവശിഷ്ടങ്ങൾ പൂർണ്ണമായി നീക്കം ചെയ്താൽ മാത്രമേ റെയിൽവേ സ്റ്റേഷൻ വഴിയുള്ള ട്രെയിൻ ഗതാഗതം പൂർണ്ണതോതിൽ സാധാരണ നിലയിലാകൂ. സ്റ്റേഷനിലെ രണ്ടും മൂന്നും ട്രാക്കുകൾ താൽക്കാലികമായി അടച്ചിട്ടിരിക്കുന്നതിനാൽ ഇന്നും ട്രെയിനുകൾ വൈകി ഓടാൻ സാധ്യതയുണ്ട്. നിലവിൽ ഒന്ന്, നാല് ട്രാക്കുകളിലൂടെ മാത്രമാണ് സർവീസുകൾ തിരിച്ചുവിട്ടിരിക്കുന്നത്.