ക്ലാസിൽ ശ്രദ്ധിച്ചില്ലെന്ന് ആരോപിച്ച് ചൂരലടിയേറ്റ അഞ്ചാം ക്ലാസുകാരിയുടെ കൈക്ക് പൊട്ടൽ; അധ്യാപകനെതിരെ പരാതി

മലപ്പുറം: ക്ലാസിൽ ശ്രദ്ധിക്കുന്നില്ലെന്ന് ആരോപിച്ച് അധ്യാപകൻ ചൂരൽകൊണ്ട് അടിച്ചതിനെത്തുടർന്ന് അഞ്ചാം ക്ലാസ് വിദ്യാർത്ഥിനിയുടെ കൈക്ക് പൊട്ടലേറ്റതായി പരാതി. മലപ്പുറം കൽപ്പനഞ്ചേരി കല്ലിങ്ങലിലാണ് ഈ ഞെട്ടിക്കുന്ന സംഭവം ഉണ്ടായത്. ക്രൂരമായ മർദ്ദനമേറ്റ കുട്ടിയുടെ കൈയിലെ എല്ലിനാണ് പൊട്ടലുള്ളത്.

​എം.എസ്.എം.എച്ച്.എസ്.എസ്. കല്ലിങ്ങൽപ്പറമ്പിലെ അധ്യാപകനെതിരെ കർശന നിയമനടപടികളുമായി മുന്നോട്ടുപോകാനാണ് കുട്ടിയുടെ കുടുംബത്തിന്റെ തീരുമാനം.

മകൾക്ക് കൈക്ക് ഗുരുതരമായി പരിക്കേറ്റിട്ടും സ്കൂൾ അധികൃതരോ അധ്യാപകരോ കുട്ടിയെ കൃത്യസമയത്ത് ആശുപത്രിയിൽ എത്തിക്കാൻ തയ്യാറായില്ലെന്ന് കുട്ടിയുടെ അമ്മ ആരോപിച്ചു. പരിക്കേറ്റ കുട്ടിയെ അധ്യാപകർ ചേർന്ന് വീട്ടിൽ എത്തിക്കുക മാത്രമാണ് ചെയ്തതെന്നും, പിന്നീട് രക്ഷിതാക്കൾ ചേർന്നാണ് കുട്ടിയെ അടിയന്തരമായി ആശുപത്രിയിലേക്ക് മാറ്റിയതെന്നും കുടുംബം വ്യക്തമാക്കി.