പശ്ചിമേഷ്യൻ യുദ്ധസാഹചര്യം: സർക്കാർ പ്രത്യേക പ്രവാസി പഠനകമ്മിറ്റി രൂപവത്കരിക്കണമെന്ന് കാന്തപുരം

കുന്ദമംഗലം: പശ്ചിമേഷ്യൻ യുദ്ധസാഹചര്യം വീണ്ടും ആശങ്കയുയർത്തുന്ന പശ്ചാത്തലത്തിൽ പ്രവാസി മലയാളികൾ നേരിടുന്ന സാമ്പത്തിക-സാമൂഹിക അരക്ഷിതാവസ്ഥ അതീവ ഗുരുതരമാണെന്ന് കാന്തപുരം എ.പി. അബൂബക്കർ മുസ്ല്യാർ പറഞ്ഞു. യുദ്ധത്തിന്റെ പ്രത്യാഘാതങ്ങൾ കൃത്യമായി പഠിക്കുന്നതിനും പ്രവാസികൾക്കായി കൃത്യമായ സമാശ്വാസ പുനരധിവാസ പദ്ധതികൾ ആവിഷ്കരിച്ച് നടപ്പാക്കുന്നതിനുമായി സർക്കാർ ഒരു പ്രത്യേക പഠനകമ്മിറ്റിക്ക് രൂപം നൽകണമെന്ന് അദ്ദേഹം ആവശ്യപ്പെട്ടു. മർകസ് ഗ്ലോബൽ കൗൺസിലിന്റെ ആഭിമുഖ്യത്തിൽ സംഘടിപ്പിച്ച പ്രവാസി സമ്മിറ്റ് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

​ചടങ്ങിൽ വി.പി.എം. ഫൈസി വില്യാപ്പള്ളി അധ്യക്ഷത വഹിച്ചു. സയ്യിദ് അലി ബാഫഖി തങ്ങൾ പ്രാർഥനയ്ക്ക് നേതൃത്വം നൽകിയ സമ്മേളനത്തിൽ മർകസ് ഡയറക്ടർ ജനറൽ സി. മുഹമ്മദ് ഫൈസി മുഖ്യപ്രഭാഷണം നടത്തി. സി.പി. ഉബൈദുല്ല സഖാഫി, ദുൽകിഫിൽ സഖാഫി എന്നിവർ ആശംസകൾ നേർന്നു സംസാരിച്ചു.

​സമ്മിറ്റിനോടനുബന്ധിച്ച് നടന്ന വിവിധ സെഷനുകൾക്ക് സയ്യിദ് മുഹമ്മദ് തുറാബ് സഖാഫി, സയ്യിദ് ശിഹാബുദ്ദീൻ അഹ്‌ദൽ മുത്തനൂർ, സയ്യിദ് ശറഫുദ്ദീൻ ജമലുല്ലൈലി, സയ്യിദ് ജസീൽ കാമിൽ സഖാഫി, ഇബ്റാഹീം സഖാഫി പുഴക്കാട്ടിരി, ഉസ്‌മാൻ സഖാഫി തിരുവത്ര, എം.സി. അബ്ദുൽ ഗഫൂർ മാസ്റ്റർ വാഴക്കാട്, റോഷൻ നൂറാനി, മർസൂഖ് സഅദി കാമിൽ സഖാഫി, ശരീഫ് കാരശ്ശേരി, കരീം ഹാജി മേമുണ്ട എന്നിവർ നേതൃത്വം നൽകി.