ചെരണ്ടത്തൂരിൽ ഗൃഹനാഥൻ കിടപ്പുമുറിയിൽ തൂങ്ങിമരിച്ച നിലയിൽ; കാൽ നിലത്തുതൊട്ട നിലയിൽ കണ്ടെത്തിയതിൽ ദുരൂഹത

മണിയൂർ: ചെരണ്ടത്തൂരിൽ ഗൃഹനാഥനെ വീടിനകത്ത് തൂങ്ങിമരിച്ച നിലയിൽ കണ്ടെത്തി. ചെരണ്ടത്തൂർ ചാലിൽ പാറോൽ ഗോപി (60) ആണ് മരിച്ചത്. വീടിന്റെ കിടപ്പുമുറിയിലെ ജനൽ കർട്ടൻ പൈപ്പിൽ തൂങ്ങിയ നിലയിലായിരുന്നു മൃതദേഹം. ഇന്ന് ഉച്ചയ്ക്ക് 1.30-ഓടെയാണ് സംഭവം വീട്ടുകാരുടെ ശ്രദ്ധയിൽപ്പെടുന്നത്.

ഗോപിയുടെ ഭാര്യ മല്ലിക പുറത്തുപോയ സമയത്തായിരുന്നു സംഭവം നടന്നത്. ഇവർ തിരികെ വീട്ടിലെത്തിയപ്പോഴാണ് കിടപ്പുമുറിയിൽ ജനൽ കർട്ടൻ പൈപ്പിൽ കെട്ടിത്തൂങ്ങിയ നിലയിൽ മൃതദേഹം കണ്ടത്. എന്നാൽ മൃതദേഹത്തിന്റെ കാൽ നിലത്തുതൊട്ട നിലയിലായിരുന്നുവെന്ന് പറയപ്പെടുന്നു. ഈ സാഹചര്യം മരണത്തിൽ ശക്തമായ ദുരൂഹതയുയർത്തിയിട്ടുണ്ട്. സംഭവത്തെ തുടർന്ന് പയ്യോളി പോലീസ് സ്ഥലത്തെത്തി പ്രാഥമിക പരിശോധനകൾ നടത്തി ഇൻക്വസ്റ്റ് നടപടികൾ ആരംഭിച്ചു. മരണകാരണം വ്യക്തമാകാൻ ഫോറൻസിക് വിദഗ്ദ്ധരും സ്ഥലത്തെത്തി വിശദമായ പരിശോധനകൾ നടത്തിവരികയാണ്.