പാലക്കാട് മെഡിക്കൽ കോളേജ് ഹോസ്റ്റലിലെ കുടിവെള്ളത്തിൽ ഇ-കോളി ബാക്ടീരിയ; 50 വിദ്യാർഥികൾ ചികിത്സയിൽ, പ്രതിഷേധം

പാലക്കാട്: പാലക്കാട് മെഡിക്കൽ കോളേജിലെ ഹോസ്റ്റലുകളിൽ കുടിക്കാനും ഭക്ഷണം പാകം ചെയ്യാനും കിട്ടുന്നത് മലിനജലം. കുടിവെള്ളത്തിൽ ഇ കോളി ബാക്ടീരിയ കണ്ടെത്തി. പൊതുമരാമത്ത് വകുപ്പിന്റെ അറ്റകുറ്റപണിക്കിടെ മലിനജനം കുഴൽക്കിണറിൽ എത്തിയതാണ് പ്രതിസന്ധിക്ക് കാരണമെന്നാണ് അധികൃതർ പറയുന്നത്. സംഭവത്തിന് പിന്നാലെ വിദ്യാർത്ഥികൾ ചെളിവെള്ളം നിറച്ച ബക്കറ്റുകളുമായി പ്രതിഷേധിച്ചു.

പാലക്കാട് മെഡിക്കൽ കോളജിലെ ആൺകുട്ടികളുടെയും പെൺകുട്ടികളുടെയും ഹോസ്റ്റലുകളിൽ 500 ൽ അധികം വിദ്യാർത്ഥികളാണ് താമസിക്കുന്നത്. കഴിഞ്ഞ കുറച്ച് ദിവസമായി വിദ്യാർത്ഥികൾക്കുള്ള ഭക്ഷണം ഉണ്ടാക്കുന്നത് ഈ വെള്ളം ഉപയോഗിച്ചായിരുന്നു. വെള്ളത്തിൻ്റെ നിറം മാറിയത് ശ്രദ്ധയിൽപ്പെട്ടപ്പോൾ ലാബിൽ പരിശോധനയ്ക്ക് അയച്ചു. ഈ കോളി ബാക്ടീരിയയുടെ സാനിധ്യം കണ്ടെത്തിയതോടെ വിദ്യാർത്ഥികൾ പ്രതിഷേധവുമായി രം​ഗത്തെത്തി. ക്യാമ്പസിനകത്ത് പിഡബ്ല്യഡി റോഡ് നിർമ്മിക്കുന്നുണ്ട്. ഇതിനിടെ കുഴൽ കിണറിലേക്ക് മലിനജലം ഒഴുകിയെത്തിയെന്നാണ് പരാതി. 50 ഓളം വിദ്യാർത്ഥികൾ വയറിളക്കം ബാധിച്ച് ചികിത്സയിലാണ്. ടാങ്കറുകളിൽ വെള്ളമെത്തിച്ച് താത്കലിയ പരിഹാരം കണ്ടെത്താനുള്ള ശ്രമത്തിലാണ് കോളേജ് അധികൃതർ.