തിരുവമ്പാടി-മറിപ്പുഴ റോഡ് നവീകരണം മന്ദഗതിയിൽ; ചപ്പാത്ത് മുങ്ങി മലയോര മേഖലയിൽ യാത്രാദുരിതം

മുക്കം: കിഫ്ബി പദ്ധതിയിൽ ഉൾപ്പെടുത്തി 108.3 കോടി രൂപ ചെലവിൽ ആരംഭിച്ച തിരുവമ്പാടി-ആനക്കാംപൊയിൽ-മറിപ്പുഴ റോഡ് നവീകരണം മന്ദഗതിയിലായതോടെ മലയോര മേഖലയിലെ യാത്രക്കാർ കടുത്ത ദുരിതത്തിൽ. നിർമാണം തുടങ്ങി രണ്ട് വർഷം കഴിഞ്ഞിട്ടും പ്രവൃത്തികൾ എങ്ങുമെത്താത്തതിനെത്തുടർന്ന് റോഡ് പൂർണമായും കുഴിയും വെള്ളക്കെട്ടുമായി തകർന്നു കിടക്കുകയാണ്. തുരങ്കപാത നിർമാണം പുരോഗമിക്കുന്ന മറിപ്പുഴ ഭാഗത്തുനിന്ന് തിരുവമ്പാടിയിലെത്താനുള്ള ഏക ആശ്രയമായ ഈ റോഡിന്റെ തകർച്ച, മഴക്കാലത്ത് തുരങ്കപാത പ്രദേശത്ത് എന്തെങ്കിലും അത്യാഹിതമുണ്ടായാൽ രക്ഷാപ്രവർത്തനത്തെപ്പോലും ബാധിക്കുമെന്ന ആശങ്കയിലാണ് നാട്ടുകാർ.

​ഉരാളുങ്കൽ ലേബർ കോൺട്രാക്ട് കോ-ഓപ്പറേറ്റീവ് സൊസൈറ്റിക്കാണ് നിർമാണച്ചുമതല. റോഡിനിരുവശവും രണ്ടടിയോളം ഉയരത്തിൽ ഓവുചാലിനായി കോൺക്രീറ്റ് ഭിത്തികൾ സ്ഥാപിച്ചതോടെ പ്രദേശവാസികൾക്ക് വീടുകളിലേക്ക് വാഹനങ്ങൾ കയറ്റാൻ കഴിയാത്ത അവസ്ഥയാണ്. മാത്രമല്ല, നാലടിയോളം ആഴത്തിൽ നിർമിച്ച ഓവുചാലുകൾക്ക് മുകളിൽ സ്ലാബുകൾ സ്ഥാപിക്കാത്തത് കുട്ടികൾ ഉൾപ്പെടെയുള്ളവർക്ക് വലിയ സുരക്ഷാഭീഷണിയാകുന്നു.

​മലയോര മേഖലയിൽ തുടരുന്ന ശക്തമായ മഴയെത്തുടർന്ന് പുഴയിൽ ജലനിരപ്പുയർന്ന് മുത്തപ്പൻപുഴ ചപ്പാത്ത് വെള്ളത്തിനടിയിലായതോടെ ആനക്കാംപൊയിൽ-പുല്ലൂരാംപാറ റോഡിൽ മുക്കാൽ മണിക്കൂറോളം ഗതാഗതം പൂർണമായി തടസ്സപ്പെട്ടു. ഇതോടെ തിരുവമ്പാടിയിൽനിന്ന് മറിപ്പുഴയിലേക്ക് സർവീസ് നടത്തിയിരുന്ന കെ.എസ്.ആർ.ടി.സി. ബസ് യാത്രക്കാരെ വഴിയിലിറക്കി സർവീസ് അവസാനിപ്പിച്ചു. റോഡ് നവീകരണത്തിന്റെ ഭാഗമായി മുത്തപ്പൻപുഴ പാലം പുനർനിർമിക്കുന്നതിനാലാണ് താൽക്കാലികമായി ഈ ചപ്പാത്ത് പണിതത്. കഴിഞ്ഞ മേയ്, ജൂൺ മാസങ്ങളിലുണ്ടായ മലവെള്ളപ്പാച്ചിലിൽ ഒലിച്ചുപോയതിനെത്തുടർന്ന് വീണ്ടും പുനർനിർമിച്ച ചപ്പാത്താണ് ഇപ്പോൾ വീണ്ടും മുങ്ങിയിരിക്കുന്നത്.