വയനാട് തുരങ്കപാത നിർമ്മാണ സ്ഥലത്ത് മണ്ണിടിച്ചിൽ; മൂന്ന് മരണം, ഏഴ് പേരെ കാണാതായി

​വയനാട്: മേപ്പാടി കള്ളാടി തുരങ്കപാത നിർമ്മാണ സ്ഥലത്തുണ്ടായ വൻ മണ്ണിടിച്ചിലിൽ മൂന്ന് പേർ മരണപ്പെട്ടു. അപകടത്തിൽ ഏഴ് പേരെ കാണാതാവുകയും ഒൻപത് പേരെ ഗുരുതര പരിക്കുകളോടെ ആശുപത്രിയിൽ പ്രവേശിപ്പിക്കുകയും ചെയ്തിട്ടുണ്ട്. ഹിര കുമാർ (32), ദിലീപ് (19), സൂരജ് യാദവ് (25), സഞ്ജയ് താക്കൂർ (35), രജനീഷ് (27), തന്മയ് ഘോഷ് (28), രൂപമാൽ (ജയ) (37), കുഞ്ചു (39), സന്തോഷ് കുമാർ എന്നിവരെയാണ് നിലവിൽ ആശുപത്രിയിൽ പ്രവേശിപ്പിച്ചിരിക്കുന്നത്. ഇന്ന് രാവിലെ 10.30-ഓടെ മേപ്പാടിയിൽ നിന്ന് ചൂരൽമലയിലേക്ക് പോകുന്ന പ്രധാന പാതയിലാണ് നിർമ്മാണം നടക്കുന്നതിനിടെ മണ്ണിടിഞ്ഞ് റോഡിലേക്ക് പതിച്ച് അപകടമുണ്ടായത്.

​നിർമ്മാണ സ്ഥലത്ത് അശാസ്ത്രീയമായി കൂട്ടിയിട്ടിരുന്ന മണ്ണ് നീക്കം ചെയ്യണമെന്ന് കമ്പനിക്ക് നേരത്തെ നിർദ്ദേശം നൽകിയിരുന്നതാണെന്നും എന്നാൽ കരാറുകാർ അത് പാലിച്ചില്ലെന്നും മുഖ്യമന്ത്രി വി.ഡി. സതീശൻ വ്യക്തമാക്കി. ഇതാണ് ദൗർഭാഗ്യകരമായ ദുരന്തത്തിന് കാരണമായതെന്നും അദ്ദേഹം കൂട്ടിച്ചേർത്തു. ഇതൊരു പ്രകൃതിദുരന്തമല്ലെന്നും മറിച്ച് അശാസ്ത്രീയമായ മണ്ണുകൂട്ടിയിടൽ മൂലം സംഭവിച്ച മനുഷ്യനിർമ്മിത ദുരന്തമാണെന്നും മന്ത്രി ടി. സിദ്ദിഖ് ആരോപിച്ചു. നിർദ്ദേശം ലംഘിച്ച നിർമ്മാണ കമ്പനിക്കെതിരെ സർക്കാർ കർശന നിയമനടപടികൾ സ്വീകരിക്കുമെന്നും അദ്ദേഹം അറിയിച്ചു.

​അപകടത്തെത്തുടർന്ന് കാണാതായവർക്കായുള്ള തിരച്ചിലിനായി മൂന്ന് എൻ.ഡി.ആർ.എഫ് (NDRF) ടീമുകളെ സ്ഥലത്ത് സജ്ജമാക്കിയിട്ടുണ്ട്. വയനാടിന് പുറമെ കോഴിക്കോട്, തൃശ്ശൂർ ജില്ലകളിൽ നിന്നുള്ള പ്രത്യേക ദുരന്തനിവാരണ സേനാംഗങ്ങളും ഉടൻ സ്ഥലത്തെത്തും. ഒരു ടീമിൽ 34 പേരടങ്ങുന്നതാണ് എൻ.ഡി.ആർ.എഫ് സംഘം. അതേസമയം, ജില്ലയിൽ കഴിഞ്ഞ 24 മണിക്കൂറിനിടെ 265 മില്ലിമീറ്റർ അതിതീവ്ര മഴ പെയ്തിട്ടും അധികൃതർ യെല്ലോ അലേർട്ട് മാത്രമാണ് നൽകിയിരുന്നതെന്ന് ആക്ഷേപമുണ്ട്. സാധാരണ നിലയിൽ 204.4 മില്ലിമീറ്ററിൽ കൂടുതൽ മഴ ലഭിച്ചാൽ റെഡ് അലേർട്ട് പ്രഖ്യാപിക്കേണ്ടതായിരുന്നുവെങ്കിലും വയനാട്ടിൽ ദുരന്തം സംഭവിച്ചതിന് ശേഷമാണ് റെഡ് അലേർട്ട് പുറപ്പെടുവിച്ചത്.