ചാലിയം-ബേപ്പൂർ അഴിമുഖത്ത് തോണി മറിഞ്ഞു: നാല് മത്സ്യത്തൊഴിലാളികളെയും രക്ഷപ്പെടുത്തി

ബേപ്പൂർ: ചാലിയത്തുനിന്ന് മത്സ്യബന്ധനത്തിന് പോയ ഫൈബർതോണി ശക്തമായ കാറ്റിലും തിരയിലുംപെട്ട് മറിഞ്ഞു അപകടത്തിൽപ്പെട്ട നാല്മത്സ്യത്തൊഴിലാളികളെയും അത്ഭുതകരമായി രക്ഷപ്പെടുത്തി. ചാലിയം സ്വദേശി അഷ്റഫിൻ്റെ ഉടമസ്ഥതയിലുള്ള 'മാളിയേക്കൽ' എന്ന തോണിയാണ് ചാലിയം-ബേപ്പൂർ അഴിമുഖത്ത് വെച്ച് അപകടത്തിൽപ്പെട്ടത്. മീൻപിടിത്തം കഴിഞ്ഞ് തിരികെ ചാലിയത്തേക്ക് വരുന്നതിനിടെയായിരുന്നു ദുരന്തം. തോണിയിലുണ്ടായിരുന്ന തൊഴിലാളികളെ സമീപത്തുണ്ടായിരുന്ന മറ്റ് തോണിക്കാർ ചേർന്നാണ് ഉടൻ തന്നെ രക്ഷപ്പെടുത്തി പരപ്പനങ്ങാടി ഹാർബറിൽ എത്തിച്ചത്.

​ചാലിയം സ്വദേശി മാളിയേക്കൽ അഷ്റഫ് (52), പശ്ചിമബംഗാൾ കൊൽക്കത്ത സ്വദേശികളായ അശോക് ഹാൽഡർ (41), ഷാജിൻ ദാസ് (54), സോമൻ (48) എന്നിവരാണ് തോണിയിലുണ്ടായിരുന്നത്. അപകടത്തിൽ നിന്നും രക്ഷപ്പെട്ട ഇവരെ നിലവിൽ പരപ്പനങ്ങാടിയിലെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്.

​കടലിൽ വെച്ചുണ്ടായ ഈ അപകടത്തിൽ തോണി മറിഞ്ഞതിനെത്തുടർന്ന് ഏകദേശം നാലുലക്ഷം രൂപയുടെ വലിയ സാമ്പത്തിക നഷ്‌ടം സംഭവിച്ചതായി ഉടമ അഷ്റഫ് അറിയിച്ചു.