കനത്ത മഴ: തിരുവമ്പാടിയിൽ കലുങ്കിൻ്റെ സംരക്ഷണഭിത്തി ഇടിഞ്ഞു

തിരുവമ്പാടി: കനത്തമഴയെ തുടർന്ന് തമ്പലമണ്ണ-ചെങ്ങോം ക്രോസ്റോഡിലെ കല്ലുവട്ടംപടി കലുങ്കിന്റെ സംരക്ഷണഭിത്തി തകർന്നു. ടാറിങ് ഭാഗമടക്കം പൊളിഞ്ഞ് വൻ കുഴികൾ രൂപപ്പെട്ടതോടെ ഇതുവഴിയുള്ള യാത്ര വലിയ ഭീതിയിലായിരിക്കുകയാണ്. ജൽ ജീവൻ മിഷൻ പദ്ധതിയുടെ ഭാഗമായി കുഴിയെടുത്ത് പൈപ്പിട്ട ഭാഗമാണ് ഇപ്പോൾ ഇടിഞ്ഞുതാഴ്ന്നിരിക്കുന്നത്.

​മതിയായ രീതിയിൽ അസംസ്കൃത വസ്തു‌ക്കൾ ചേർത്ത് മണ്ണിട്ടുറപ്പിക്കാതെ പൈപ്പിട്ടുപോയതാണ് റോഡ് തകർച്ചയ്ക്ക് കാരണമായതെന്ന് നാട്ടുകാർ ആരോപിക്കുന്നു. വാഹനങ്ങൾ ഈ കുഴിയിൽച്ചാടി നിയന്ത്രണംവിടുന്നത് പതിവായതോടെ അപകടസാധ്യതയും വർദ്ധിച്ചിട്ടുണ്ട്.

​സ്ഥലം സന്ദർശിച്ച ഗ്രാമപ്പഞ്ചായത്ത് വാർഡ് മെമ്പർ ഷീബാ പ്രകാശ്, പഞ്ചായത്ത് എ.ഇ. ഹൃദ്യ, ഓവർസിയർ റസീന, റോയ് തോമസ് കടപ്രയിൽ, പി.സി. മെവിൻ എന്നിവർ സ്ഥിതിഗതികൾ വിലയിരുത്തി. തകർന്ന ഭാഗത്ത് എത്രയുംപെട്ടെന്ന് അറ്റകുറ്റപ്പണി നടത്തുമെന്ന് പഞ്ചായത്ത് അധികൃതർ ഉറപ്പുനൽകിയിട്ടുണ്ട്.