നെല്ലിയാമ്പതിയില്‍ രാത്രിയാത്രയ്ക്കും വിനോദസഞ്ചാരത്തിനും കര്‍ശന നിയന്ത്രണം ഏര്‍പ്പെടുത്തി ജില്ലാ കളക്ടര്‍

പാലക്കാട്: കനത്ത കാലവര്‍ഷത്തെ തുടർന്ന് പ്രകൃതിരമണീയമായ നെല്ലിയാമ്പതി ചുരത്തില്‍ രാത്രികാല ഗതാഗതത്തിനും വിനോദസഞ്ചാരത്തിനും ജില്ലാ കളക്ടര്‍ കര്‍ശന നിയന്ത്രണം ഏര്‍പ്പെടുത്തി. ജില്ലയില്‍ മഴ ശക്തമായി തുടരുന്ന സാഹചര്യത്തിലും നെല്ലിയാമ്പതി ചുരം റോഡില്‍ വലിയ തോതിൽ പാറ വീഴ്ചയ്ക്കും മണ്ണിടിച്ചിലിനും സാധ്യത നിലനില്‍ക്കുന്നതിനാലുമാണ് ഈ മുൻകരുതൽ നടപടിയെന്ന് കളക്ടര്‍ അറിയിച്ചു.

​പ്രദേശവാസികളുടെ അത്യാവശ്യ യാത്രകള്‍ക്കും അടിയന്തര വൈദ്യസഹായ ആവശ്യങ്ങള്‍ക്കുമുളള വാഹനങ്ങള്‍ക്കൊഴികെ മറ്റെല്ലാ വിനോദസഞ്ചാര-യാത്രാ വാഹനങ്ങള്‍ക്കും വൈകുന്നേരം ആറ് മണി മുതല്‍ രാവിലെ ആറ് മണിവരെയാണ് റോഡിൽ നിയന്ത്രണം ഏര്‍പ്പെടുത്തിയിട്ടുള്ളത്. ഈ സുരക്ഷാ നിര്‍ദേശങ്ങള്‍ ലംഘിച്ച് രാത്രിയാത്ര നടത്തുന്നവർക്കെതിരെ കര്‍ശനമായ നിയമനടപടികള്‍ സ്വീകരിക്കുമെന്നും ജില്ലാ ഭരണകൂടം വ്യക്തമാക്കി.