തകർന്നുതരിപ്പണമായി പന്തിരിക്കര-വരയാലൻകണ്ടി റോഡ്; യാത്രാദുരിതത്തിൽ നാട്ടുകാർ

കടിയങ്ങാട്: ചങ്ങരോത്ത് ഗ്രാമപ്പഞ്ചായത്ത് എട്ടാം വാർഡിലെ പന്തിരിക്കര-വരയാലൻകണ്ടി റോഡ് പൂർണമായും തകർന്നതോടെ നാട്ടുകാരുടെ യാത്ര ദുരിതത്തിലായി. റോഡിലുടനീളം രൂപപ്പെട്ട വലിയ കുഴികളിലൂടെ അതിസാഹസികമായാണ് നിലവിൽ വാഹനങ്ങൾ കടന്നുപോകുന്നത്. കനത്ത മഴ പെയ്യുമ്പോൾ കുഴികളിൽ വെള്ളം നിറയുന്നതിനാൽ റോഡിന്റെ ആഴമറിയാതെ ഇരുചക്രവാഹനങ്ങൾ നിരന്തരം അപകടത്തിൽപ്പെടുന്നുണ്ടെന്ന് നാട്ടുകാർ പരാതിപ്പെടുന്നു.

​നിരവധി സ്കൂൾ ബസുകൾ സർവീസ് നടത്തുന്ന പ്രധാന പാതയാണിത്. കൂടാതെ മദ്രസയിലേക്കും അങ്കണവാടിയിലേക്കും പോകുന്ന ചെറിയ കുട്ടികൾ ഉൾപ്പെടെയുള്ള കാൽനടയാത്രക്കാർ ചെളിവെള്ളത്തിൽ നീന്തി വേണം ലക്ഷ്യസ്ഥാനത്തെത്താൻ. റോഡിന്റെ തകർച്ച കാരണം കാൽനടയാത്ര പോലും അസാധ്യമായിരിക്കുകയാണ്. റോഡിലെ കുഴികൾ മൂലം അപകടങ്ങൾ വർധിക്കുന്ന സാഹചര്യത്തിൽ, താൽക്കാലിക ആശ്വാസമെന്ന നിലയിൽ ക്വാറി വേസ്റ്റ് ഇട്ടെങ്കിലും കുഴികൾ അടയ്ക്കാൻ അധികൃതർ അടിയന്തര നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.