പൊട്ടിവീണ വൈദ്യുതക്കമ്പിയിൽനിന്ന് ഷോക്കേറ്റ് അഞ്ച് കുറുനരികൾ ചത്തു: നാട്ടുകാരന്റെ ഇടപെടലിൽ ഒഴിവായത് വൻദുരന്തം

ഓമശ്ശേരി: ഗ്രാമപ്പഞ്ചായത്തിലെ പതിനൊന്നാം വാർഡിൽപ്പെട്ട കൈവേലിമുക്ക് കാപ്പാട് പൊട്ടിവീണ വൈദ്യുതക്കമ്പിയിൽനിന്ന് ഷോക്കേറ്റ് അഞ്ച് കുറുനരികൾ കൂട്ടത്തോടെ ചത്തു. ബുധനാഴ്ച പുലർച്ചെ ഒന്നരയോടെയാണ് ഈ ദാരുണ സംഭവം നടന്നത്. കൂട്ടമായെത്തിയ കുറുനരികൾ, കമ്പി പൊട്ടിവീണുകിടന്ന വെള്ളക്കെട്ടിലേക്ക് ഇറങ്ങിയപ്പോഴാണ് ഷോക്കേറ്റത്. മദ്രസ വിദ്യാർഥികളടക്കം ഒട്ടേറെ ആളുകൾ സ്ഥിരമായി നടന്നുപോകുന്ന പ്രധാന റോഡിലാണ് ഈ ലൈൻ പൊട്ടിവീണത്. പ്രദേശവാസിയായ റയീസിന്റെ സമയോചിതമായ ഇടപെടൽ കൊണ്ടാണ് ഇവിടെ വലിയൊരു മനുഷ്യദുരന്തം ഒഴിവായത്. പുലർച്ചെ അഞ്ചരയോടെ അപകടം ശ്രദ്ധയിൽപ്പെട്ട ഇയാൾ ഉടൻ തന്നെ കെ.എസ്.ഇ.ബി അധികൃതരെ വിവരമറിയിക്കുകയും ജീവനക്കാരെത്തി പ്രദേശത്തെ വൈദ്യുതി ബന്ധം വിച്ഛേദിക്കുകയുമായിരുന്നു.

​സമീപത്തെ പ്ലാവിൽനിന്ന് ചക്ക വീണതിനെത്തുടർന്നാണ് വൈദ്യുതക്കമ്പി പൊട്ടിയതെന്നാണ് നാട്ടുകാർ പറയുന്നത്. ലൈനുകളിലേക്ക് ചാഞ്ഞുനിൽക്കുന്ന മരച്ചില്ലകൾ കൃത്യമായി വെട്ടിമാറ്റാനും കാലപ്പഴക്കം ചെന്ന കമ്പികൾ അടിയന്തരമായി മാറ്റിസ്ഥാപിക്കാനും അധികൃതർ തയ്യാറാകണമെന്ന് നാട്ടുകാർ ആവശ്യപ്പെട്ടു. സംഭവമറിഞ്ഞ് കെ.എസ്.ഇ.ബി, വനംവകുപ്പ് ഉദ്യോഗസ്ഥരും ജനപ്രതിനിധികളും സ്ഥലത്തെത്തി തുടർനടപടികൾ സ്വീകരിച്ചു.