പുതിയ ബസിന്റെ ആദ്യദിന കളക്ഷൻ 'നവധാര' പാലിയേറ്റീവ് കെയറിന് നൽകി മാതൃകയായി കടലുണ്ടിയിലെ ബസ് ജീവനക്കാരും ഉടമയും

കടലുണ്ടി: കടലുണ്ടി-കോഴിക്കോട് റൂട്ടിലോടുന്ന 'അൽ അമീൻ' എന്ന പുതിയ ബസിന്റെ ആദ്യദിവസത്തെ സർവീസിൽ നിന്ന് ലഭിച്ച മുഴുവൻ തുകയും തൊഴിലാളികളുടെ വേതനവും നവധാര പാലിയേറ്റീവ് കെയർ സെന്ററിലെ കിടപ്പുരോഗികൾക്കായി കൈമാറി. കടലുണ്ടി ലെവൽക്രോസ് പരിസരത്ത് നടന്ന ചടങ്ങിൽ കടലുണ്ടി ഗ്രാമപ്പഞ്ചായത്ത് പ്രസിഡന്റ് ഒ. ഭക്തവത്സലൻ പുതിയ ബസിന്റെ സർവീസ് ഫ്ലാഗ് ഓഫ് ചെയ്തു. ചടങ്ങിൽ നവധാര ചീഫ് കോഡിനേറ്റർ ഉദയൻ കാർക്കോളി അധ്യക്ഷത വഹിച്ചു.

​ബസ്സുടമ സി.കെ. അബ്ദുറഹ്‌മാൻ മുഖ്യാതിഥിയായ ചടങ്ങിൽ പഞ്ചായത്ത് അംഗം ഡൽജിത്ത് അണ്ടിപ്പറ്റ്, പാലിയേറ്റീവ് ട്രഷറർ ഒ. മനോജ്, സെക്രട്ടറി ഒ. വിശ്വനാഥൻ എന്നിവർ സംസാരിച്ചു. ബസ് ഓണേഴ്സ് അസോസിയേഷൻ ഫറോക്ക് ഏരിയാ പ്രസിഡന്റ് പി.കെ. അബ്ദുള്ളക്കോയ, ഏരിയാ ട്രഷറർ എ.വി. വഹാബ്, സി.കെ. റാഫത്ത്, ബസ് മാനേജർ എ. സുനിൽ, യൂനസ് കടലുണ്ടി, രാജേഷ് മാപ്പോലി, അബൂബക്കർ പഴയില്ലത്ത് തുടങ്ങിയ സാമൂഹിക-സാംസ്കാരിക രംഗത്തെ പ്രമുഖരും ചടങ്ങിൽ സംബന്ധിച്ചു. കാരുണ്യപ്രവർത്തനത്തിൽ പങ്കാളികളായ ബസ് ജീവനക്കാരെയും ഉടമയെയും നാട്ടുകാർ അഭിനന്ദിച്ചു.