റോഡ് പണിയെ തുടർന്ന് നിർമിച്ച മതിൽ ഇടിഞ്ഞുവീണു; കുഴൽക്കിണറും പമ്പ്ഹൗസും തകർന്നു, വൻ നാശനഷ്ടം

വടകര: കഴിഞ്ഞദിവസങ്ങളിൽ പെയ്ത ശക്തമായ മഴയെത്തുടർന്ന് തണ്ണീർപന്തൽ കുനിങ്ങാട് കൂവാട്ട് അമ്പലത്തിന് സമീപം കൂറ്റൻ മതിൽ ഇടിഞ്ഞുവീണു വലിയ നാശനഷ്ടം. മാളുനിവാസിൽ സുരജന്റെ വീടിന്റെ മതിലാണ് തകർന്നത്. ചേലക്കാട് - വില്യാപ്പള്ളി - വടകര റോഡ് നവീകരണ പ്രവൃത്തികളുടെ ഭാഗമായി പഴയത് പൊളിച്ചുമാറ്റി പുതിയതായി നിർമിച്ച മതിലാണിത്. മതിൽ വീണ് സുരജന്റെ വീട്ടിലെ കുഴൽക്കിണറും പമ്പ് ഹൗസും പൂർണമായി തകർന്നു.

​ഏകദേശം നാല് മീറ്ററിലധികം ഉയരമുള്ള ഈ മതിൽ സമീപത്തുള്ള വൈദ്യുത ട്രാൻസ്ഫോർമറിനോട് ചേർന്നാണ് സ്ഥിതി ചെയ്യുന്നത്. സമീപത്തുകൂടി ജലജീവൻ മിഷന്റെ പൈപ്പ് ലൈൻ സ്ഥാപിക്കുന്നതിനായി വൻതോതിൽ കുഴിയെടുത്തിരുന്നു. കനത്ത മഴ പെയ്തതോടെ ഈ കുഴിയിലേക്ക് മതിലിന്റെ അടിത്തറ താഴ്ന്നുപോയതാണ് മതിൽ പൂർണമായും തകരാൻ കാരണമായതെന്ന് വീട്ടുകാർ ആരോപിച്ചു. വലിയൊരു ദുരന്തമാണ് ഇവിടെ തലനാരിഴയ്ക്ക് ഒഴിവായത്.

​സംഭവസ്ഥലം പി.ഡബ്ല്യു.ഡി., വാട്ടർ അതോറിറ്റി ഉദ്യോഗസ്ഥർ സന്ദർശിച്ച് സ്ഥിതിഗതികൾ വിലയിരുത്തി. മഴയുടെ ശക്തി കുറയുന്നതോടെ തകർന്ന മതിലിന്റെ ബാക്കി ഭാഗം പൂർണമായി പൊളിച്ചുമാറ്റി പുതിയത് നിർമിക്കാനുള്ള നടപടികൾ സ്വീകരിക്കുമെന്ന് അധികൃതർ ഉറപ്പുനൽകിയതായി വീട്ടുടമസ്ഥൻ പറഞ്ഞു.