ലോഡ്ജിൽ മുറിയെടുത്ത് പ്രസവിച്ച യുവതിയും നവജാതശിശുവും മരിച്ചനിലയിൽ; ഓട്ടോ ഡ്രൈവർ കസ്റ്റഡിയിൽ

തൃശ്ശൂർ: തൃശ്ശൂർ നഗരമധ്യത്തിലെ ലോഡ്ജ് മുറിയിൽ പ്രസവിച്ച യുവതിയെയും നവജാത ശിശുവിനെയും മരിച്ചനിലയിൽ കണ്ടെത്തി. തൃശ്ശൂർ എടമുട്ടം സ്വദേശിനി ജ്യോതി (30) ആണ് മരിച്ചത്. സംഭവവുമായി ബന്ധപ്പെട്ട് യുവതിയുടെ സുഹൃത്തായ ഓട്ടോ ഡ്രൈവറെ പൊലീസ് കസ്റ്റഡിയിലെടുത്തു.

​കഴിഞ്ഞ ജൂൺ 27-നാണ് ഓട്ടോ ഡ്രൈവർക്കൊപ്പം യുവതി ലോഡ്ജിലെ 108-ാം നമ്പർ മുറിയിൽ വാടകയ്‌ക്കെടുത്തത്. ഇന്ന് ഉച്ചയോടെ റിസപ്ഷനിലെത്തിയ ഓട്ടോ ഡ്രൈവർ, കഴിഞ്ഞ രണ്ടുദിവസമായി താൻ വിളിച്ചിട്ട് യുവതി ഫോണെടുക്കുന്നില്ലെന്ന വിവരം ജീവനക്കാരെ അറിയിക്കുകയായിരുന്നു. ഇതിൽ ദുരൂഹത തോന്നിയ ലോഡ്ജ് അധികൃതർ ഉടൻതന്നെ പൊലീസിൽ വിവരമറിയിച്ചു.

​പൊലീസും ഫയർഫോഴ്സും സ്ഥലത്തെത്തി മുറി ബലമായി തുറന്നപ്പോഴാണ് യുവതിയെയും കുഞ്ഞിനെയും രക്തത്തിൽ കുളിച്ച നിലയിൽ മരിച്ചതായി കണ്ടെത്തിയത്. പ്രസവത്തെത്തുടർന്നുണ്ടായ അമിത രക്തസ്രാവമാണോ മരണകാരണമെന്ന് പൊലീസ് പരിശോധിച്ചുവരികയാണ്. സംഭവത്തിൽ മറ്റെന്തെങ്കിലും ദുരൂഹതയുണ്ടോയെന്ന കാര്യത്തിൽ പൊലീസ് അന്വേഷണം ഊർജിതമാക്കിയിട്ടുണ്ട്.