മിഠായിത്തെരുവിൽ പെട്ടെന്ന് പ്രത്യക്ഷപ്പെട്ട കുഴി; വ്യാപാരികളും യാത്രക്കാരും ദുരിതത്തിൽ

കോഴിക്കോട്: കോർട്ട്റോഡ് രണ്ടാംഗേറ്റിന് സമീപം മിഠായിത്തെരുവിൽ പെട്ടെന്ന് പ്രത്യക്ഷപ്പെട്ട വലിയൊരു കുഴി വ്യാപാരികളെയും യാത്രക്കാരെയും ഒരുപോലെ വലയ്ക്കുന്നു. സമീപത്തെ ബഹുനിലക്കെട്ടിടത്തിലേക്ക് ഹൈടെൻഷൻ ഭൂഗർഭ കേബിൾ കണക്ഷൻ നൽകുന്നതിനായി കെ.എസ്.ഇ.ബി. എടുത്ത കുഴിയാണ് ഇപ്പോൾ വൻ വിനയായി മാറിയിരിക്കുന്നത്. പൊതുവേ വീതികുറഞ്ഞ ഈ റോഡിൽ കുഴി രൂപപ്പെട്ടതോടെ വലിയ ഗതാഗതക്കുരുക്കാണ് അനുഭവപ്പെടുന്നത്. കൂടാതെ ഇതിന് സമീപത്തെ നടപ്പാതയും ഇപ്പോൾ അപകടാവസ്ഥയിലാണ്.

​കനത്ത മഴപെയ്ത് കുഴിയിൽ വെള്ളം നിറഞ്ഞതോടെ കാൽനടക്കാർക്കും വാഹനയാത്രക്കാർക്കും ഇത് വലിയൊരു ഭീഷണിയായി മാറിയിരിക്കുകയാണ്. റോഡിലെ ഈ തടസ്സം കാരണം സമീപത്തെ കടകളിലേക്ക് ആളുകൾക്ക് എത്താൻ സാധിക്കാത്തത് തങ്ങൾക്ക് വൻ സാമ്പത്തിക നഷ്ടം വരുത്തിവെക്കുന്നതായി പ്രദേശത്തെ വ്യാപാരികൾ പരാതിപ്പെടുന്നു. എന്നാൽ, നിലവിലുള്ള പ്രതിസന്ധി കണക്കിലെടുത്ത് എത്രയും വേഗം പണി പൂർത്തിയാക്കി റോഡ് പൂർവസ്ഥിതിയിലാക്കുമെന്ന് കെ.എസ്.ഇ.ബി. അധികൃതർ വ്യക്തമാക്കി.