സംസ്ഥാനത്ത് വ്യാപക മഴ തുടരും; കോഴിക്കോട് ഉൾപ്പെടെ 3 ജില്ലകളിൽ ഓറഞ്ച് അലേർട്ട്, ഇടിമിന്നൽ ജാഗ്രത

തിരുവനന്തപുരം: സംസ്ഥാനത്ത് ഇന്നും വ്യാപകമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. ജാഗ്രതയുടെ ഭാഗമായി കോഴിക്കോട്, കണ്ണൂർ, കാസർകോട് ജില്ലകളിൽ ഇന്ന് ഓറഞ്ച് അലേർട്ട് പ്രഖ്യാപിച്ചു. നാളെ കണ്ണൂർ, കാസർകോട് ജില്ലകളിലും ഓറഞ്ച് അലേർട്ടായിരിക്കും. ഒറ്റപ്പെട്ടയിടങ്ങളിൽ അതിശക്തമായ മഴയ്ക്കൊപ്പം ഇടിമിന്നലിനും സാധ്യതയുള്ളതിനാൽ പൊതുജനങ്ങൾ കനത്ത ജാഗ്രത പാലിക്കണമെന്ന് അധികൃതർ നിർദേശിച്ചു.

​ഇന്ന് തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, വയനാട് ജില്ലകളിൽ യെല്ലോ അലേർട്ട് പുറപ്പെടുവിച്ചിട്ടുണ്ട്. നാളെ കണ്ണൂരും കാസർകോടും ഒഴികെയുള്ള മറ്റ് 12 ജില്ലകളിലും യെല്ലോ അലേർട്ടായിരിക്കും. അറബിക്കടലിലും വടക്കൻ തെലങ്കാനയ്ക്ക് സമീപത്തും രൂപപ്പെട്ട ചക്രവാതച്ചുഴികളുടെ സ്വാധീനഫലമായാണ് നിലവിൽ സംസ്ഥാനത്ത് കനത്ത മഴ ലഭിക്കുന്നത്. ജൂലൈ മൂന്ന് വരെ കേരളം, മാഹി, ലക്ഷദ്വീപ് തീരങ്ങളിൽ മഴ തുടരുമെന്നും മണിക്കൂറിൽ 60 കിലോമീറ്റർ വരെ വേഗതയുള്ള ശക്തമായ കാറ്റിന് സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു.

​അതിനിടെ, സംസ്ഥാനത്തിന്റെ വിവിധ ഭാഗങ്ങളിൽ കനത്ത മഴയിൽ നാശനഷ്ടങ്ങൾ റിപ്പോർട്ട് ചെയ്തിട്ടുണ്ട്. ഇടുക്കി മണിയാറൻകുടിയിൽ ശക്തമായ മഴയിലും കാറ്റിലും മരം വീണ് അജയൻ രവിയുടെ വീട് ഭാഗികമായി തകർന്നു. അപകട ശബ്ദം കേട്ട് വീട്ടുകാർ ഉടനടി പുറത്തേക്ക് ഓടിയതിനാൽ വൻ ദുരന്തം ഒഴിവകുകയും ആർക്കും പരിക്കേൽക്കാതെ രക്ഷപ്പെടുകയുമായിരുന്നു.