ടോൾ വെട്ടിച്ചാൽ പിടിവീഴും; കേസെടുക്കാനും 1000 രൂപ പിഴ ഈടാക്കാനും പൊലീസ്

കോഴിക്കോട്: ദേശീയപാത ബൈപ്പാസിൽ ടോൾ വെട്ടിച്ച് കടന്നുപോകുന്ന വാഹനങ്ങൾക്കെതിരെ കർശന നടപടിയുമായി പൊലീസ്. ടോൾ നൽകാതെ പോകുന്ന വാഹനങ്ങളുടെ വിവരങ്ങൾ ടോൾ പ്ലാസ അധികൃതർ പൊലീസിന് കൈമാറാൻ ആരംഭിച്ചു കഴിഞ്ഞു. കഴിഞ്ഞദിവസം മാത്രം 86 വാഹനങ്ങളാണ് ഇത്തരത്തിൽ ടോൾ നൽകാതെ കടന്നുപോയത്. തൊട്ടടുത്ത ദിവസം ഉച്ചയ്ക്ക് ഒരു മണിവരെ 32 വാഹനങ്ങളും ടോൾ നൽകാതെ പോയതായി അധികൃതർ വ്യക്തമാക്കുന്നു.

​ടോൾ നൽകാതെ നിയമലംഘനം നടത്തുന്ന വാഹനങ്ങൾക്ക് ട്രാഫിക് പൊലീസ് 1000 രൂപയാണ് പിഴ ചുമത്തുന്നത്. ടോൾ വെട്ടിച്ച് കടന്നുപോകുന്നവയിൽ ഭൂരിഭാഗവും കാറുകളാണ്. ടോൾ പ്ലാസയിൽ ജീവനക്കാരുമായി ഉണ്ടാകുന്ന തർക്കങ്ങൾ ഒഴിവാക്കാനായി, പണം നൽകാത്ത വാഹനങ്ങൾ തടഞ്ഞുനിർത്തുന്നത് ജീവനക്കാർ നിർത്തിവെച്ചിരുന്നു. ഇതോടെയാണ് ടോൾ വെട്ടിപ്പ് വ്യാപകമായതും പൊലീസ് കർശന നടപടികളിലേക്ക് കടന്നതും.