റോഡരികിലെ കുഴിയിൽവീണ് കാൽനടയാത്രക്കാരന് പരിക്ക്

പേരാമ്പ്ര: നഗരമധ്യത്തിൽ ഇ.എം.എസ്. സഹകരണ ആശുപത്രിക്ക് സമീപം ചെമ്പ്ര റോഡിലേക്ക് കടക്കുന്ന ഭാഗത്തെ റോഡരികിലെ കുഴിയിൽവീണ് കാൽനടയാത്രക്കാരന് പരിക്കേറ്റു. പേരാമ്പ്ര കാരയിൽ വിജയനാണ് (71) അപകടത്തിൽപ്പെട്ടത്. ഞായറാഴ്ച്‌ച രാത്രി എട്ടുമണിയോടെയായിരുന്നു സംഭവം. ചളിവെള്ളവും കേബിളുകളും നിറഞ്ഞ, ഒരുമീറ്റർ നീളവും രണ്ടാളുടെ താഴ്ചയുമുള്ള കുഴിയിലേക്കാണ് ഇദ്ദേഹം തലകീഴായി വീണത്.

​അപകടം കണ്ടയുടൻ ഓടിയെത്തിയ ലോറി ഡ്രൈവർ വിജയന്റെ ഷർട്ടിൽ പിടിച്ച് ഉയർത്തിപ്പിടിച്ചതാണ് വൻ ദുരന്തം ഒഴിവാക്കിയത്. തുടർന്ന് അഗ്നിരക്ഷാസേനയും പോലീസും നാട്ടുകാരും ചേർന്നാണ് ഇദ്ദേഹത്തെ പുറത്തെടുത്തത്. രക്ഷാപ്രവർത്തനത്തിനിടെ ഒരു അഗ്നിരക്ഷാസേനാംഗത്തിനും പരിക്കേറ്റിട്ടുണ്ട്. തലയ്ക്ക് പരിക്കേറ്റ വിജയനെ ആദ്യം ഇ.എം.എസ്. സഹകരണ ആശുപത്രിയിലും പിന്നീട് കോഴിക്കോട്ടെ സ്വകാര്യ ആശുപത്രിയിലും പ്രവേശിപ്പിച്ചു.

​ആശുപത്രി പരിസരമായതിനാൽ ഏറെ തിരക്കേറിയ ഈ ഭാഗത്ത് യാതൊരുവിധ അപായസൂചനകളും സ്ഥാപിക്കാതെയാണ് കുഴി തുറന്നിട്ടിരുന്നത്. പെട്ടെന്ന് ശ്രദ്ധയിൽപ്പെട്ടതുകൊണ്ട് മാത്രമാണ് ജീവൻ രക്ഷിക്കാനായതെന്നും, അപകടഭീഷണിയുയർത്തുന്ന ഈ കുഴി എത്രയുംവേഗം മൂടണമെന്നും നാട്ടുകാർ ആവശ്യപ്പെട്ടു.