വിലങ്ങാട് വനമേഖലയിൽ അനധികൃതമായി പ്രവേശിച്ച യുവാക്കൾക്കെതിരെ കേസെടുക്കും; നിലവിൽ വനംവകുപ്പിന്റെ കസ്റ്റഡിയിൽ

കോഴിക്കോട്: വിലങ്ങാട് വാളൂക്ക് വനമേഖലയിൽ വഴിതെറ്റി കുടുങ്ങുകയും പിന്നീട് രക്ഷപ്പെടുത്തുകയും ചെയ്ത യുവാക്കൾക്കെതിരെ വനംവകുപ്പ് കേസെടുക്കും. സുരക്ഷാ മുൻകരുതലുകളോ അനുമതിയോ ഇല്ലാതെ അനധികൃതമായി സംരക്ഷിത വനമേഖലയിൽ പ്രവേശിച്ചതിനാണ് ഇവർക്കെതിരെ നിയമനടപടി സ്വീകരിക്കുന്നത്. നിലവിൽ ഈ യുവാക്കൾ വനംവകുപ്പിന്റെ കസ്റ്റഡിയിലാണ് ഉള്ളത്.

​കഴിഞ്ഞദിവസം വൈകീട്ട് നാലരയോടെയാണ് ഇവർ കാടിനുള്ളിലേക്ക് പോയത്. എന്നാൽ സമയം വൈകി ഇരുട്ടിയതോടെ കാട്ടിൽ വഴിഅറിയാതെ ഇവർ കുടുങ്ങുകയായിരുന്നു. വനത്തിനുള്ളിൽ നിന്ന് അസ്വാഭാവികമായ ശബ്ദങ്ങൾ കേൾക്കുകയും ടോർച്ചിന്റെ വെളിച്ചം ശ്രദ്ധയിൽപ്പെടുകയും ചെയ്തതോടെ പരിഭ്രാന്തരായ നാട്ടുകാർ വനംവകുപ്പിനെ വിവരമറിയിക്കുകയായിരുന്നു. ഇതിനിടെ വനാതിർത്തിയിൽ ഇവർ സഞ്ചരിച്ചിരുന്ന രണ്ട് ബൈക്കുകളും കണ്ടെത്തുകയുണ്ടായി. തുടർന്നാണ് വനംവകുപ്പും അഗ്നിരക്ഷാസേനയും നാട്ടുകാരും ചേർന്ന് തിരച്ചിൽ നടത്തി ഇവരെ പുറത്തെത്തിച്ചത്.

​കാടിനകത്ത് അകപ്പെട്ടതോടെ രക്ഷപ്പെടാനായി തങ്ങൾ ഉച്ചത്തിൽ നിലവിളിക്കുകയും മൊബൈൽ ഫ്ലാഷ്‌ലൈറ്റ് തെളിയിക്കുകയുമായിരുന്നു എന്ന് രക്ഷപെട്ട ശേഷം യുവാക്കൾ വ്യക്തമാക്കി. പ്രകൃതിഭംഗിയാൽ അനുഗൃഹീതമായ 'മുടി' വ്യൂ പോയിന്റിലേക്ക് സാധാരണയായി സഞ്ചാരികൾ ട്രക്കിംഗിനായി വിലങ്ങാട് വഴിയാണ് പോകാറുള്ളത്. എന്നാൽ വനംവകുപ്പിന്റെ കൃത്യമായ അനുമതിയില്ലാതെ ഇത്തരം ഉൾവനങ്ങളിലേക്ക് പ്രവേശിക്കുന്നത് കടുത്ത നിയമലംഘനമാണെന്ന് അധികൃതർ ഓർമ്മിപ്പിച്ചു.