ഓപ്പറേഷൻ തൂഫാൻ; ലഹരിവിരുദ്ധ കേരളത്തിനായി യുവാക്കളുടെ സ്നേഹയാത്ര തുടങ്ങി

പാറക്കടവ്: ഓപ്പറേഷൻ തൂഫാൻ്റെ ഭാഗമായി 'ലഹരി വിരുദ്ധ കേരളത്തിനായി കൈകോർക്കാം' എന്ന മുദ്രാവാക്യവുമായി നാദാപുരത്തെ യുവാക്കളുടെ കേരള യാത്രയ്ക്ക് തുടക്കമായി. ലഹരി വിരുദ്ധ പോസ്റ്ററുകൾ പതിച്ച അഞ്ച് വാഹനങ്ങളിലായി നാദാപുരത്തുനിന്നുള്ള 20 ചെറുപ്പക്കാരാണ് ഒരാഴ്‌ച നീണ്ടുനിൽക്കുന്ന ഈ യാത്ര ആരംഭിച്ചിരിക്കുന്നത്.

​കോഴിക്കോട്, മലപ്പുറം, പാലക്കാട്, തൃശ്ശൂർ, എറണാകുളം തുടങ്ങിയ ജില്ലകളിലൂടെ സഞ്ചരിക്കുന്ന യാത്ര ഈ മാസം 30-ന് തിരുവനന്തപുരത്ത് സമാപിക്കും. യാത്രയ്ക്കിടയിൽ വിവിധ ജില്ലകളിലെ സ്വീകരണ കേന്ദ്രങ്ങളിൽ ലഹരിവിരുദ്ധ ലഘുലേഖാ വിതരണം, മോട്ടിവേഷൻ ക്ലാസുകൾ, കലാപരിപാടികൾ എന്നിവയും ഇവർ സംഘടിപ്പിക്കുന്നുണ്ട്.

​പ്രവാസി വ്യാപാരിയും സാമൂഹിക പ്രവർത്തകനുമായ നൗഷാദ് തേർകണ്ടിയുടെ നേതൃത്വത്തിലാണ് യാത്ര നടക്കുന്നത്. നാദാപുരത്ത് നടന്ന ചടങ്ങിൽ കെ.എം. അഭിജിത്ത് എം.എൽ.എ. യാത്ര ഫ്ലാഗോഫ് ചെയ്തു.

​ചടങ്ങിൽ നാദാപുരം ഗ്രാമപ്പഞ്ചായത്ത് വൈസ് പ്രസിഡന്റ് കെ.എം. രഘുനാഥ്, ലഹരിനിർമാർജന സമിതി ജില്ലാ ഓർഗനൈസിങ് സെക്രട്ടറി എം.കെ. അഷ്റഫ്, സിറാജ് നാദാപുരം, കെ. ഇസ്‌മായിൽ, ഇസ്സു കുനിയിൽ, നൗഫൽ അത്തോളി, ടി.പി. അജാസ്, ടി.കെ. ഇജാസ്, സഫ്വാൻ, നിഹാൽ എന്നിവർ പങ്കെടുത്തു.