കൊല്ലത്ത് ടിപ്പര്‍ ലോറി ബസ് സ്റ്റോപ്പിലേക്ക് പാഞ്ഞുകയറി ദുരന്തം; മൂന്ന് മരണം

​കൊല്ലം: കൊട്ടാരക്കര നീലേശ്വരത്ത് നിയന്ത്രണം നഷ്ടപ്പെട്ട ടിപ്പര്‍ ലോറി ബസ് സ്‌റ്റോപ്പിലേക്ക് പാഞ്ഞുകയറി മൂന്ന് പേര്‍ മരിച്ചു. അപകടത്തില്‍ പരിക്കേറ്റ അഞ്ച് പേരെ ആശുപത്രിയില്‍ പ്രവേശിപ്പിച്ചു. ഇതില്‍ രണ്ട് പേരുടെ നില അതീവ ഗുരുതരമാണ്. രാവിലെ ഏഴ് മണിയോടെയാണ് നാടിനെ നടുക്കിയ അപകടം സംഭവിച്ചത്.

​മണ്ണ് കയറ്റി അമിതവേഗതയിലെത്തിയ ലോറി, കവലയിലെ വളവ് തിരിഞ്ഞുവന്ന ബൈക്കിലിടിച്ച് നിയന്ത്രണം തെറ്റി ബസ് കാത്തുനിൽക്കുകയായിരുന്നവരുടെ ഇടയിലേക്ക് ഇടിച്ചുകയറുകയായിരുന്നുവെന്ന് ദൃക്‌സാക്ഷികള്‍ പറയുന്നു. അപകടസമയത്ത് ബസ് സ്റ്റോപ്പിലുണ്ടായിരുന്ന എട്ട് പേരില്‍ ഏഴ് പേരും വിദ്യാര്‍ത്ഥികളായിരുന്നു. ലോറി ഇടിച്ചുകയറിയതോടെ വാഹനവും അതിലുണ്ടായിരുന്ന മണ്ണും ആളുകളുടെ മേലേക്ക് മറിയുകയായിരുന്നു. ഇടിയുടെ ആഘാതത്തിൽ സമീപത്തെ മതിലും തകർന്നു വീണു.

​ഉടൻ തന്നെ നാട്ടുകാരും രക്ഷാപ്രവർത്തകരും ചേർന്ന് മണ്ണുമാറ്റിയാണ് അപകടത്തിൽപ്പെട്ടവരെ പുറത്തെടുത്തത്. മണ്ണിനടിയിൽപ്പെട്ട മുഴുവൻ പേരെയും പുറത്തെടുത്തിട്ടുണ്ടെന്ന് രക്ഷാപ്രവർത്തകർ സ്ഥിരീകരിച്ചു. നിലവിൽ കൊട്ടാരക്കര താലൂക്ക് ആശുപത്രിയിൽ പ്രവേശിപ്പിച്ച പരിക്കേറ്റവരെ വിദഗ്ധ ചികിത്സയ്ക്കായി മറ്റ് വലിയ ആശുപത്രികളിലേക്ക് മാറ്റാനുള്ള നടപടികൾ പുരോഗമിക്കുകയാണ്.