അന്താരാഷ്ട്ര യോഗ ദിനം: ഇന്ത്യാ ടൂറിസത്തിന്റെ കേരള സംസ്ഥാനതല പരിപാടി സർഗാലയയിൽ സംഘടിപ്പിച്ചു

പ്രൗഢമായ ഉദ്ഘാടനം

ഞായറാഴ്ച രാവിലെ 6:30ന് ആരംഭിച്ച യോഗ ദിന പരിപാടി കോഴിക്കോട് അസിസ്റ്റന്റ് കളക്ടർ ശ്രീമതി മാളവിക ജി. നായർ, IAS ഭദ്രദീപം കൊളുത്തി ഉദ്ഘാടനം ചെയ്തു. പയ്യോളി മുനിസിപ്പാലിറ്റി ചെയർപേഴ്‌സൺ ശ്രീമതി. സാഹിറ എൻ. ചടങ്ങിൽ അധ്യക്ഷത വഹിച്ചു. ഇന്ത്യാ ടൂറിസം കൊച്ചി അസിസ്റ്റന്റ് ഡയറക്ടർ ശ്രീ എം. നരേന്ദ്രൻ, സർഗാലയ ചീഫ് ഓപ്പറേറ്റിംഗ് ഓഫീസർ ശ്രീ. രാജേഷ് ടി.കെ. എന്നിവർ വിശിഷ്ടാതിഥി കളായി.

പയ്യോളി മുനിസിപ്പാലിറ്റി വൈസ് ചെയർമാൻ ശ്രീ മുജേഷ് ശാസ്ത്രി, ആരോഗ്യ സ്റ്റാൻഡിങ് കമ്മിറ്റി ചെയർപേഴ്‌സൺ ശ്രീമതി. കെ.ടി. സിന്ധു, പൊതുമരാമത്ത് സ്റ്റാൻഡിങ് കമ്മിറ്റി ചെയർമാൻ ശ്രീ. കുഞ്ഞാമു പി., മലബാർ ടൂറിസം കൗൺസിൽ പ്രസിഡന്റ് ശ്രീ. സജീർ പടിക്കൽ, മുനിസിപ്പൽ കൗൺസിലർമാരായ ശ്രീ. നിധീഷ് പി.വി., ശ്രീമതി. നിഷ ഗിരീഷ് എന്നിവരും പ്രശസ്ത കളരി ഇൻസ്ട്രക്ടർ ശ്രീ. മുഹമ്മദ് ഗുരുക്കൾ, ശ്രീമതി. മിനി.പി.എസ് നായർ, പ്രമുഖ ടൂറിസം സംരംഭകൻ ശ്രീ. ബഷീർ ബഡയക്കണ്ടി എന്നിവരുൾപ്പെടെയുള്ള പ്രമുഖർ ചടങ്ങിൽ പങ്കെടുത്തു സംസാരിച്ചു.

ശ്രദ്ധേയമായി യോഗ ഡെമോൺസ്‌ട്രേഷനും നൃത്തവും

ശ്രീമതി സുമ സി.ആറിന്റെ നേതൃത്വത്തിൽ യോഗ്യതയുള്ള യോഗ പരിശീലകർ അണിനിരന്ന കൂട്ട യോഗ പ്രദർശനം (Yoga Demonstration) പരിപാടിയുടെ പ്രധാന ആകർഷണമായിരുന്നു. ദൈനംദിന ജീവിതത്തിൽ യോഗയെ ഒരു ശീലമാക്കേണ്ടതിന്റെ പ്രാധാന്യം വിളിച്ചോതുന്നതായിരുന്നു ഈ സെഷൻ. തുടന്ന് വടകര അമൃത പബ്ലിക് സ്കൂളിലെ വിദ്യാർത്ഥികൾ യോഗ ഇൻസ്ട്രക്ടർ ശ്രീമതി. ഷർബിന പിയുടെ നേതൃത്വത്തിൽ അവതരിപ്പിച്ച യോഗാധിഷ്ഠിത നൃത്തപരിപാടിയും കാണികളുടെ കൈയടി നേടി.

സർഗാലയയുടെ വികസനക്കുതിപ്പ്

മലബാർ മേഖലയിലെ സമ്പന്നമായ കലയും പൈതൃകവും വിളിച്ചോതുന്ന മുൻനിര സാംസ്കാരിക ടൂറിസം കേന്ദ്രമായ സർഗാലയയുടെ പ്രാധാന്യം കേന്ദ്ര ടൂറിസം മന്ത്രാലയം തിരിച്ചറിഞ്ഞിട്ടുണ്ടെന്ന് ചടങ്ങിൽ സംസാരിച്ചവർ ഓർമ്മിപ്പിച്ചു.

"ഗ്ലോബൽ ഗേറ്റ്‌വേ ടു മലബാഴ്‌സ് കൾച്ചറൽ ക്രൂസിബിൾ അറ്റ് സർഗാലയ" എന്ന പദ്ധതിക്കായി കേന്ദ്ര ഗവൺമെന്റ് 2025-ൽ ₹95.34 കോടി രൂപ അനുവദിച്ചിരുന്നു. ഈ വർഷം നവംബറോടെ പൂർത്തിയാകുന്ന ഈ വൻകിട പദ്ധതിയിലൂടെ സർഗാലയയിലെ അടിസ്ഥാന സൗകര്യങ്ങൾ കൂടുതൽ ശക്തമാകുകയും, മലബാറിന്റെ സാംസ്കാരിക കവാടമായി ഇത് മാറുകയും ചെയ്യും.

വിവിധ സ്‌കൂളുകളിലെയും കോളേജുകളിലെയും വിദ്യാർത്ഥികൾ, ടൂറിസം രംഗത്തെ പ്രമുഖർ, നാട്ടുകാർ, സർക്കാർ ഉദ്യോഗസ്ഥർ, ക്രീഡാ ഫീമെയ്ൽ ഫിറ്റ്നസ് സെന്റർ അംഗങ്ങൾ എന്നിവരടക്കം ഇരുന്നൂറോളം പേരുടെ സജീവ പങ്കാളിത്തം കൊണ്ട് 2026ലെ അന്താരാഷ്ട്ര യോഗ ദിനാചരണം അർത്ഥവത്തായ ഒന്നായി മാറി.