കലാമണ്ഡലം മേഖലയിൽ വീണ്ടും കുരങ്ങുശല്യം രൂക്ഷമാകുന്നു; ആശങ്കയിൽ പ്രദേശവാസികളും വിദ്യാർഥികളും

ചെറുതുരുത്തി: കലാമണ്ഡലം പരിസരപ്രദേശങ്ങളിൽ കുരങ്ങുകളുടെ ശല്യം വീണ്ടും രൂക്ഷമാകുന്നതായി പരാതി. കൂട്ടത്തോടെ എത്തുന്ന കുരങ്ങുകൾ കലാമണ്ഡലത്തിന് സമീപത്തെ വീടുകളിലും വിദ്യാർഥികൾ താമസിക്കുന്ന ഹോസ്റ്റൽ പരിസരങ്ങളിലും ഇപ്പോൾ പതിവ് കാഴ്ചയായി മാറിയിരിക്കുകയാണ്.

​മുൻപ് കലാമണ്ഡലത്തിന് പിൻവശത്തുള്ള പമ്പ് ഹൗസ് മേഖലയിലായിരുന്നു ഇവയുടെ ശല്യം വൻതോതിൽ ഉണ്ടായിരുന്നത്. കുരങ്ങുകൾ ജനവാസമേഖലകളിൽ ഇറങ്ങി വീടുകളിൽ കയറി ഭക്ഷണസാധനങ്ങൾ വലിച്ചുവാരിയിടുകയും വ്യാപകമായി നശിപ്പിക്കുകയും ചെയ്യുന്നത് വാർത്തയായിരുന്നു. ഇതേത്തുടർന്ന് വനംവകുപ്പ് അധികൃതർ സ്ഥലത്തെത്തി കൂടുവെച്ച് കുരങ്ങുകളെ പിടികൂടാൻ നടപടി സ്വീകരിച്ചതോടെയാണ് താൽക്കാലിക ആശ്വാസമുണ്ടായത്. എന്നാൽ ചെറിയൊരു ഇടവേളയ്ക്ക് ശേഷം ഇപ്പോൾ വീണ്ടും കുരങ്ങുകൾ കൂട്ടത്തോടെ ജനവാസമേഖലകളിലേക്ക് ഇറങ്ങുന്നത് പ്രദേശവാസികളെയും വിദ്യാർഥികളെയും ഒരുപോലെ ബുദ്ധിമുട്ടിലാക്കുന്നുണ്ട്.