താമരശ്ശേരി ചുരത്തിൽ നിയന്ത്രണം വിട്ട മിനിവാൻ താഴ്ചയിലേക്ക് മറിഞ്ഞു; യാത്രക്കാരൻ അത്ഭുതകരമായി രക്ഷപ്പെട്ടു

താമരശ്ശേരി: താമരശ്ശേരി ചുരത്തിൽ നിയന്ത്രണംവിട്ട മിനിവാൻ പാതയോരത്തെ കടുത്ത താഴ്‌ചയിലേക്ക് മറിഞ്ഞു. ചുരം ഏഴാം ഹെയർപിൻ വളവിന് സമീപം വെള്ളിയാഴ്ച പുലർച്ചെ മൂന്ന് മണിയോടെയാണ് നാടിനെ നടുക്കിയ ഈ അപകടം ഉണ്ടായത്.

​വയനാട് ഭാഗത്തുനിന്ന് കോഴിക്കോട് ഭാഗത്തേക്ക് വരികയായിരുന്ന വാഹനമാണ് ചുരമിറങ്ങുന്നതിനിടെ പെട്ടെന്ന് നിയന്ത്രണംവിട്ട് അപകടത്തിൽപ്പെട്ടത്. വാഹനം താഴ്ചയിലേക്ക് പതിക്കുമെന്ന് ഉറപ്പായ നിമിഷത്തിൽ, അതിലുണ്ടായിരുന്ന പന്നൂർ സ്വദേശി റാഷിദ് പുറത്തേക്ക് എടുത്തുചാടി അത്ഭുതകരമായി രക്ഷപ്പെടുകയായിരുന്നു. മീറ്ററുകളോളം താഴ്ചയുള്ള ഈ കൊക്കയിലേക്ക് മറിഞ്ഞ മിനിവാൻ, ഭാഗ്യം കൊണ്ടുമാത്രമാണ് പാതയോരത്തെ ഒരു വലിയ മരത്തിൽ തട്ടി തങ്ങിനിന്നത്. വലിയൊരു ദുരന്തമാണ് ഇവിടെ തലനാരിഴയ്ക്ക് ഒഴിവായത്.