താമരശ്ശേരി താലൂക്ക് ആശുപത്രിവളപ്പിൽ മരം കടപുഴകി വീണു; ആളപായമില്ല

താമരശ്ശേരി: കനത്ത കാറ്റിലും മഴയിലും പെട്ട് താമരശ്ശേരി ഗവ. താലൂക്ക് ആശുപത്രിവളപ്പിലെ വൻമരം കടപുഴകി വീണു. വ്യാഴാഴ്ച വൈകീട്ട് അഞ്ചുമണിയോടെ ആശുപത്രിയിലെ അത്യാഹിതവിഭാഗം പ്രവർത്തിക്കുന്ന കെട്ടിടത്തിന്റെ പരിസരത്തേക്കാണ് മരം വീണത്. പ്രതിദിനം നൂറുകണക്കിന് ആളുകൾ എത്തുന്ന ആശുപത്രിയിൽ, ആംബുലൻസുകൾ പതിവായി നിർത്തിയിടുന്നതും രോഗികളും ബന്ധുക്കളും നടന്നുപോകുന്നതുമായ ഭാഗത്തേക്കാണ് മരത്തിന്റെ ചില്ലകൾ പതിച്ചത്.

​മരം വീഴുന്നതിന് തൊട്ടുമുൻപ് വരെ ഈ ഭാഗത്തുണ്ടായിരുന്നവർ മഴ ശക്തമായപ്പോൾ കെട്ടിടത്തിന്റെ വരാന്തയിലേക്ക് മാറിനിന്നതിനാലും, ആ സമയം വാഹനങ്ങൾ ഇല്ലാതിരുന്നതിനാലും വലിയൊരു ദുരന്തം ഒഴിവായി. അപകടത്തെത്തുടർന്ന് മുക്കം അഗ്നിരക്ഷാസേനയും സന്നദ്ധസംഘടനാ പ്രവർത്തകരും ആശുപത്രി ജീവനക്കാരും ചേർന്ന് ഉടൻ തന്നെ മരം മുറിച്ചുമാറ്റി വൈകീട്ട് ആറരയോടെ ഗതാഗതം പുനഃസ്ഥാപിച്ചു. ശക്തമായ കാറ്റിൽ താമരശ്ശേരി മേഖലയിൽ പലയിടങ്ങളിലും മരങ്ങൾ കടപുഴകി വീഴുകയും വൈദ്യുതലൈനുകൾ തകരാറിലാവുകയും ചെയ്തതിനെ തുടർന്ന് മണിക്കൂറുകളോളമാണ് വൈദ്യുതിബന്ധം തടസ്സപ്പെട്ടത്.