കൊല്ലത്തും ആശങ്കയായി ഷിഗെല്ല രോഗബാധ: ആറ് വയസുകാരന് രോഗം സ്ഥിരീകരിച്ചു; വയനാട്ടിൽ കനത്ത ജാഗ്രത

കൊല്ലം: വയനാടിന് പിന്നാലെ കൊല്ലം ജില്ലയിലും ഷിഗെല്ല രോഗബാധ സ്ഥിരീകരിച്ചത് ആശങ്ക പരത്തുന്നു. കടുത്ത വയറിളക്കത്തെ തുടർന്ന് ആശുപത്രിയിൽ പ്രവേശിപ്പിച്ച ആറ് വയസുള്ള കുട്ടിക്കാണ് പരിശോധനയിൽ രോഗം സ്ഥിരീകരിച്ചത്. കുട്ടിയുടെ രോഗത്തിന്റെ ഉറവിടം എവിടെ നിന്നാണെന്ന കാര്യത്തിൽ ഇതുവരെ വ്യക്തത വന്നിട്ടില്ലെന്നും ഇതിനായി വിശദമായ പരിശോധനകൾ നടന്നുവരികയാണെന്നും ആരോഗ്യവകുപ്പ് അറിയിച്ചു. ഇതിനിടെ സമാനമായ രോഗലക്ഷണങ്ങളോടെ ജില്ലയിൽ മറ്റ് ചിലരെക്കൂടി ആശുപത്രികളിൽ പ്രവേശിപ്പിച്ചിട്ടുണ്ടെന്നാണ് ലഭിക്കുന്ന വിവരങ്ങൾ.

​അതേസമയം, നേരത്തെ എട്ട് വിദ്യാർത്ഥികൾക്ക് ഷിഗെല്ല സ്ഥിരീകരിച്ച വയനാട് ജില്ലയിൽ ആരോഗ്യവകുപ്പിന്റെ നേതൃത്വത്തിൽ കനത്ത ജാഗ്രത തുടരുകയാണ്. മുൻകരുതലിന്റെ ഭാഗമായി ജില്ലയിലെ 13 വിദ്യാഭ്യാസ സ്ഥാപനങ്ങൾക്ക് ഇന്ന് അവധി പ്രഖ്യാപിച്ചിട്ടുണ്ട്. രോഗം ബാധിച്ച കുട്ടികളുമായി പ്രാഥമിക സമ്പർക്കപ്പട്ടികയിലുള്ള മറ്റ് കുട്ടികൾ പഠിക്കുന്ന സ്കൂളുകൾക്കാണ് നിലവിൽ അവധി നൽകിയിരിക്കുന്നത്. സ്കൂളുകൾ അടച്ചിട്ട സാഹചര്യത്തിൽ വിദ്യാർത്ഥികളും രക്ഷിതാക്കളും അതീവ ശ്രദ്ധ പുലർത്തണമെന്ന് അധികൃതർ നിർദേശിച്ചു.

​രോഗവ്യാപന സാധ്യത കണക്കിലെടുത്ത് പൊതുജനങ്ങൾ അതീവ ജാഗ്രത പാലിക്കണമെന്ന് ആരോഗ്യവിഭാഗം മുന്നറിയിപ്പ് നൽകി. കുട്ടികളുമായുള്ള അനാവശ്യ യാത്രകൾ, പൊതുചടങ്ങുകളിലെ പങ്കാളിത്തം, ബന്ധുവീടുകളിലെ സന്ദർശനം എന്നിവ ഈ സാഹചര്യത്തിൽ പൂർണ്ണമായും ഒഴിവാക്കണം. കുടിക്കാൻ തിളപ്പിച്ചാറ്റിയ വെള്ളം മാത്രം ഉപയോഗിക്കാൻ ശ്രദ്ധിക്കുക. പനി, വയറിളക്കം, വയറുവേദന, ഛർദ്ദി തുടങ്ങിയ ലക്ഷണങ്ങൾ പ്രകടമായാൽ യാതൊരു കാരണവശാലും സ്വയംചികിത്സയ്ക്ക് മുതിരാതെ എത്രയും വേഗം അടുത്തുള്ള ആശുപത്രിയിൽ എത്തി വിദഗ്ദ്ധ ചികിത്സ തേടണമെന്നും ആരോഗ്യവകുപ്പ് കർശന നിർദേശം നൽകിയിട്ടുണ്ട്.