നടുവണ്ണൂരിൽ കാറും പിക്കപ്പ് വാനും കൂട്ടിയിടിച്ച് കാർ മറിഞ്ഞു; മൂന്നുപേർക്ക് പരിക്ക്

നടുവണ്ണൂർ : സംസ്ഥാനപാതയിൽ നടുവണ്ണൂർ മേക്കോത്ത് പെട്രോൾപമ്പിന് മുന്നിൽ കാറും പിക്കപ്പ് വാനും കൂട്ടിയിടിച്ച് മൂന്ന് പേർക്ക് പരിക്കേറ്റു. അപകടത്തിന്റെ ആഘാതത്തിൽ കാർ റോഡിൽ കീഴ്മേൽ മറിഞ്ഞു. കാർ യാത്രക്കാരായ പാവണ്ടൂർ സ്വദേശികളായ അനിത (60), ഗിരിജകുമാരി (56), ഷിജി (52) എന്നിവർക്കാണ് പരിക്കേറ്റത്. പരിക്കേറ്റ ഇവരെ ഉടൻ തന്നെ സ്വകാര്യാശുപത്രിയിൽ പ്രവേശിപ്പിച്ചു.

​ചൊവ്വാഴ്ച ഉച്ചയ്ക്ക് രണ്ട് മണിയോടെയാണ് അപകടം സംഭവിച്ചത്. ഉള്ളിയേരി ഭാഗത്തേക്ക് പോവുകയായിരുന്ന കാറാണ് പിക്കപ്പ് വാനുമായി കൂട്ടിയിടിച്ചത്. അപകടത്തിൽ പിക്കപ്പ് വാനിന്റെ മുൻഭാഗം പൂർണ്ണമായും തകർന്നിട്ടുണ്ട്.

​അപകടത്തെത്തുടർന്ന് സംസ്ഥാനപാതയിൽ ഈ റൂട്ടിൽ അരമണിക്കൂറോളം ഗതാഗതം ഭാഗികമായി തടസ്സപ്പെട്ടു. പിന്നീട് നാട്ടുകാർ ഒത്തുചേർന്ന് അപകടത്തിൽപ്പെട്ട പിക്കപ്പ് വാൻ ഉൾപ്പെടെയുള്ള വാഹനങ്ങൾ റോഡിൽനിന്ന് മാറ്റിസ്ഥാപിച്ച ശേഷമാണ് ഗതാഗതം പൂർണ്ണസ്ഥിതിയിലായത്.