മെഡിക്കൽ കോളേജിൽ നാടകീയ രംഗങ്ങൾ; ആകാശപാതയിൽ കുടുങ്ങിയ താക്കോൽ അഗ്നിരക്ഷാസേനയെടുത്തു നൽകി

കോഴിക്കോട്: മെഡിക്കൽകോളേജ് ആശുപത്രിയിലെ പ്രധാന കെട്ടിടങ്ങളെ തമ്മിൽ ബന്ധിപ്പിക്കുന്ന ആകാശപാതയിൽ രോഗിയുടെ ബന്ധുവിന്റെ കാർ താക്കോൽ കുടുങ്ങിയത് മണിക്കൂറുകളോളം ആശങ്കയ്ക്കും നാടകീയ രംഗങ്ങൾക്കും വഴിയൊരുക്കി. തിങ്കളാഴ്‌ച രാവിലെ പതിനൊന്നരയോടെയാണ് സംഭവം. പക്ഷാഘാതം വന്ന് തീവ്രപരിചരണ വിഭാഗത്തിൽ (ഐ.സി.യു) പ്രവേശിപ്പിച്ച ഭാര്യാമാതാവിന് അത്യാവശ്യമായി നൽകേണ്ട ജീവൻരക്ഷാ മരുന്ന് സൂക്ഷിച്ചിരുന്ന കാറിൻ്റെ താക്കോലാണ് അബദ്ധത്തിൽ ആകാശപാതയുടെ വശത്തെ ഗ്രില്ലിന്റെ വിടവിൽ കുടുങ്ങിയത്. കുറ്റിപ്പുറം സ്വദേശിയായ ശിവനാഥന്റെ കാറിന്റെ താക്കോലാണ് കൈവിട്ടുപോയത്. ഇതോടെ രോഗിയുടെ ബന്ധുക്കളും അവിടെയുണ്ടായിരുന്ന നാട്ടുകാരും ഒന്നരമണിക്കൂറിലേറെ സമയമെടുത്ത് താക്കോൽ പുറത്തെടുക്കാൻ പരമാവധി ശ്രമിച്ചെങ്കിലും പരാജയപ്പെടുകയായിരുന്നു.

​മെഡിക്കൽ കോളേജ് ആശുപത്രി, സൂപ്പർ സ്പെഷ്യാലിറ്റി, അത്യാഹിത വിഭാഗം എന്നീ കെട്ടിടങ്ങളെ പരസ്പരം ബന്ധിപ്പിക്കുന്ന ഈ ആകാശപാതയ്ക്ക് റോഡിൽനിന്ന് ഇരുപത് അടിയിലേറെ ഉയരമുണ്ട്. താഴേക്ക് വീണാൽ താക്കോൽ നഷ്ടപ്പെടുമെന്ന അവസ്ഥയിലായിരുന്നു ഇത് കുടുങ്ങിക്കിടന്നത്. തുടർന്ന് ഉച്ചയോടെ നാട്ടുകാർ വിവരമറിയിച്ചതിനെ തുടർന്ന് വെള്ളിമാട്‌കുന്ന് അഗ്നിരക്ഷാസേന ഉടൻതന്നെ സ്ഥലത്തെത്തുകയായിരുന്നു. ആകാശപാതയ്ക്ക് താഴെയുള്ള റോഡിൽ ഫയർ എൻജിൻ നിർത്തിയിട്ട്, അതിനുമുകളിൽ വലിയ കോണി വെച്ചുകെട്ടിയാണ് അഗ്നിരക്ഷാസേനാംഗങ്ങൾ മുകളിലേക്ക് കയറിയത്.

​അഗ്നിരക്ഷാസേനാംഗമായ എം. നിഖിൽ ജീവനക്കാരുടെ സഹായത്തോടെ കോണിയിലൂടെ സാഹസികമായി മുകളിൽക്കയറി താക്കോൽ സുരക്ഷിതമായി കൈക്കലാക്കുകയായിരുന്നു. താക്കോൽ തിരികെ ലഭിച്ചയുടൻ തന്നെ ബന്ധുക്കൾ ഓടിച്ചെന്ന് കാർ തുറന്ന് ഐ.സി.യു.വിൽ കഴിയുന്ന രോഗിക്ക് ആവശ്യമായ ജീവൻരക്ഷാ മരുന്നുകൾ കൃത്യസമയത്ത് എത്തിച്ചു നൽകി. അഗ്നിരക്ഷാസേനയുടെ സമയബന്ധിതമായ ഇടപെടൽ വലിയൊരു ആശ്വാസത്തിനാണ് വഴിയൊരുക്കിയത്.