ട്രോളിങ് നിരോധനം ചൊവ്വാഴ്ച അർധരാത്രി മുതൽ; ബോട്ടുകൾ തീരങ്ങളിലേക്ക് മടങ്ങിത്തുടങ്ങി

കൊടുങ്ങല്ലൂർ: മൺസൂൺകാല ആഴക്കടൽ മീൻപിടിത്ത നിരോധനം ചൊവ്വാഴ്‌ച അർധരാത്രി മുതൽ നിലവിൽവരുന്ന പശ്ചാത്തലത്തിൽ, കടലിൽ തമ്പടിച്ചിരുന്ന ഭൂരിഭാഗം ബോട്ടുകളും തീരമണഞ്ഞുതുടങ്ങി. നിരോധനത്തിന്റെ ഭാഗമായി ജില്ലയിലെ കടൽത്തീരങ്ങളും തുറമുഖങ്ങളും ഫിഷറീസ് വകുപ്പ്, മറൈൻ എൻഫോഴ്സ്മെന്റ്, തീരദേശ പോലീസ്, കോസ്റ്റ് ഗാർഡ് എന്നിവരുടെ കർശന നിരീക്ഷണത്തിലാണ്.

​ചൊവ്വാഴ്ച രാത്രിയോടെ അഴിക്കോട് അഴിമുഖത്തും ചേറ്റുവയിലും ഫിഷറീസ് വകുപ്പിന്റെ പ്രത്യേക ബോട്ട് കാവൽ ആരംഭിക്കും. ഇതോടെ നിരോധന കാലാവധി തീരുന്നതുവരെ ഒരു ബോട്ടിനും അഴിമുഖം കടന്ന് കടലിൽ പോകാൻ അനുമതിയുണ്ടാകില്ല.

​എന്നാൽ പരമ്പരാഗത വള്ളങ്ങൾക്ക് കടലിൽ പോകുന്നതിന് വിലക്കില്ല. ബോട്ടുകൾ പിൻവലിയുന്നതോടെ വള്ളങ്ങൾക്ക് മികച്ച രീതിയിൽ മീൻ ലഭിക്കുമെന്നാണ് തൊഴിലാളികളുടെ പ്രതീക്ഷ. കടലിൽ മീൻ ലഭ്യത കുറഞ്ഞതും കനത്ത ഇന്ധനവിലയുമാറ്റവും കാരണം ഭൂരിഭാഗം ബോട്ടുകളും വള്ളങ്ങളും മാസങ്ങളായി കടലിൽ പോകാതെ തീരത്തുതന്നെ കിടക്കുകയാണ്.

​ട്രോളിങ് നിരോധന സമയത്ത് തീരക്കടലിൽ കണ്ണിവലുപ്പം കുറഞ്ഞ വലകളും നിരോധിത സാമഗ്രികളും ഉപയോഗിച്ച് ചെറുമീനുകളെ പിടികൂടുന്ന അനധികൃത രീതികൾക്ക് സാധ്യതയേറെയാണ്. ഇത് പലപ്പോഴും പരമ്പരാഗത മീൻപിടിത്ത തൊഴിലാളികളുമായി കടലിൽ വെച്ച് സംഘർഷങ്ങൾക്കും തർക്കങ്ങൾക്കും കാരണമാകാറുള്ളത് അധികൃതർക്ക് വലിയ തലവേദന സൃഷ്ടിക്കുന്നുണ്ട്.