ഹരിതകർമസേനയ്ക്ക് ആയുർവേദ പരിചരണവുമായി 'ആയുർ ഹീൽസ്' പദ്ധതി

തൃശ്ശൂർ: ഹരിതകർമസേന അംഗങ്ങൾക്കായി സവിശേഷമായ ആയുർവേദ പരിചരണ പരിപാടിയുമായി ആയുർവേദ മെഡിക്കൽ അസോസിയേഷൻ ഓഫ് ഇന്ത്യ തൃശ്ശൂർ ജില്ലാ കമ്മിറ്റി രംഗത്തെത്തി. അസോസിയേഷന്റെ ഈ വർഷത്തെ പ്രവർത്തനോദ്ഘാടനവും 'ആയുർ ഹീൽസ്' പദ്ധതിയുടെ ഔദ്യോഗിക പ്രഖ്യാപനവും തൃശ്ശൂർ കോർപറേഷൻ ഡെപ്യൂട്ടി മേയർ എ. പ്രസാദ് നിർവഹിച്ചു. ഹരിതകർമസേനാംഗങ്ങളുടെ ആരോഗ്യസംരക്ഷണം മുൻനിർത്തിയാണ് ഈ മാതൃകാപരമായ പദ്ധതി ആവിഷ്കരിച്ചിരിക്കുന്നത്.

​ഇതോടൊപ്പം വനിതാ കമ്മിറ്റിയുടെ നേതൃത്വത്തിൽ ഔഷധസസ്യകൃഷി പ്രോത്സാഹിപ്പിക്കുന്നതിനായി നടപ്പിലാക്കുന്ന പിപ്പല്യായനം പദ്ധതിയുടെ ഭാഗമായുള്ള ഔഷധസസ്യവിതരണവും ചടങ്ങിൽ നടന്നു. ജില്ലാ പ്രസിഡന്റ് ഡോ. പി. ഉഷ അധ്യക്ഷത വഹിച്ച ചടങ്ങിൽ പ്രമുഖരായ ഡോ. മൻസൂർ അലി ഗുരുക്കൾ, ഡോ. എം.എസ്. ഗോകുലൻ, ഡോ. സാദത്ത് ദിനകർ, ഡോ. സായുജ് പോൾ, ഡോ. അരുൺ കബീർ എന്നിവർ ആശംസകൾ അർപ്പിച്ചു സംസാരിച്ചു.