മിൽമ പാൽ വില വർധനവ് ഇന്ന് മുതൽ; ലിറ്ററിന് 4 രൂപയും തൈരിന് 10 രൂപയും കൂടി

തിരുവനന്തപുരം: സംസ്ഥാനത്ത് മിൽമ പാലിനും തൈരിനും പ്രഖ്യാപിച്ച വിലവർധനവ് ഇന്ന് മുതൽ പ്രാബല്യത്തിൽ വന്നു. പാലിന് ലിറ്ററിന് 4 രൂപയും തൈരിന് കിലോഗ്രാമിന് 10 രൂപയുമാണ് വർധിപ്പിച്ചത്. വരും ദിവസങ്ങളിൽ മറ്റ് പാൽ ഉൽപന്നങ്ങൾക്കും ആനുപാതികമായി വില കൂട്ടാനുള്ള നീക്കത്തിലാണ് മിൽമ. പാചകവാതക വിലക്കയറ്റത്തിന് പിന്നാലെ പാൽ ഉൽപന്നങ്ങൾക്കും വില കൂടിയതോടെ ഹോട്ടൽ ഭക്ഷണ നിരക്കുകൾ ഇനിയും ഉയർന്നേക്കുമെന്ന ആശങ്കയിലാണ് പൊതുജനം.

​നിലവിൽ വിപണിയിലിറങ്ങുന്ന പാൽ കവറുകളിൽ പഴയ വില തന്നെയാണ് രേഖപ്പെടുത്തിയിട്ടുള്ളത്. പുതിയ വില പ്രിന്റ് ചെയ്യുന്ന നടപടികൾ പൂർത്തിയാകാൻ ഒരു മാസമെടുക്കുമെന്നും അതുവരെ പഴയ കവറുകൾ തന്നെയാകും ഉപയോഗിക്കുകയെന്നും മിൽമ അറിയിച്ചു. ക്ഷീരകർഷകരുടെ ഉൽപാദനച്ചെലവ് വർധിച്ച സാഹചര്യത്തിലാണ് വില കൂട്ടുന്നതെന്നും, വർധിപ്പിച്ച 4 രൂപയിൽ 83.75 ശതമാനവും (3.35 രൂപ) കർഷകർക്കാണ് ലഭിക്കുകയെന്നും മിൽമ വ്യക്തമാക്കുന്നു. എന്നാൽ, നിലവിലെ സാഹചര്യത്തിൽ ഈ തുക അപര്യാപ്തമാണെന്നാണ് ക്ഷീരകർഷകരുടെ വാദം. 2022 ഡിസംബർ ഒന്നിന് ലിറ്ററിന് 6 രൂപ കൂട്ടിയതിന് ശേഷമുള്ള ആദ്യ വിലവർധനവാണിത്.

​പുതുക്കിയ നിരക്കുകൾ താഴെ നൽകുന്നു:

​മഞ്ഞ കവർ പാൽ: 27 രൂപ

​നീല കവർ പാൽ: 30 രൂപ

​ഓറഞ്ച് കവർ പാൽ: 30 രൂപ

​പച്ച കവർ പാൽ: 32 രൂപ

​കൗ മിൽക്ക് (ഒരു ലിറ്റർ ബോട്ടിൽ): 75 രൂപ

​തൈര് ക്ലാസിക്: 40 രൂപ

​തൈര് എലൈറ്റ്: 45 രൂപ