ഓട്ടത്തിനിടെ കാറിന് തീപിടിച്ചു; യാത്രക്കാർ അത്ഭുതകരമായി രക്ഷപ്പെട്ടു

​മുക്കം : മണാശ്ശേരിയിൽ ഓട്ടത്തിനിടെ കാറിന് തീപിടിച്ചു. ഞായറാഴ്ച രാത്രി എട്ടുമണിയോടെയായിരുന്നു സംഭവം. നിർത്തിയിട്ടിരുന്ന കാർ എടുത്ത് ഒരു കിലോമീറ്ററോളം ദൂരം സഞ്ചരിച്ചപ്പോഴേക്കും മുൻഭാഗത്തുനിന്ന് വലിയ തോതിൽ തീ ഉയരുകയായിരുന്നു.

​കാറിന്റെ മുൻഭാഗത്തുനിന്നും തീയും പുകയും ഉയരുന്നത് ശ്രദ്ധയിൽപ്പെട്ട വഴിയാത്രക്കാരാണ് ഉള്ളിലുണ്ടായിരുന്ന യാത്രക്കാരെ വിവരം അറിയിച്ചത്. ഉടൻതന്നെ കാർ ഓടിച്ചിരുന്ന അശ്വിൻ തോമസ് വാഹനം നിർത്തി പുറത്തിറങ്ങിയതിനാൽ വലിയൊരു അപകടം ഒഴിവായി. തുടർന്ന് നാട്ടുകാരുടെ സഹായത്തോടെ വെള്ളമൊഴിച്ച് തീയണയ്ക്കാൻ ശ്രമിച്ചെങ്കിലും നിയന്ത്രിക്കാൻ സാധിച്ചില്ല.

​വിവരമറിഞ്ഞ് മുക്കം അഗ്നിരക്ഷാസേന ഗ്രേഡ് അസിസ്റ്റന്റ് സ്റ്റേഷൻ ഓഫീസർ സി. മനോജിന്റെ നേതൃത്വത്തിൽ ഫയർ ഓഫീസർമാരായ കെ.എം. ജിഗേഷ്, ടി.പി. ശരത്, ശ്രീജിൻ, കെ.എസ്. വിജയകുമാർ എന്നിവരടങ്ങുന്ന സംഘം സ്ഥലത്തെത്തിയാണ് തീ പൂർണ്ണമായും അണച്ചത്. തീപിടുത്തത്തിൽ കാറിന്റെ മുൻഭാഗം ഭാഗികമായി നശിച്ചു.