ജീനുകളിലൂടെ സൗഖ്യമാർഗം: 'നെംകോൺ 2026' രാജ്യാന്തര സമ്മേളനത്തിന് കൊച്ചിയിൽ തുടക്കം

​കൊച്ചി: ന്യൂട്രീഷ്യണൽ ആൻഡ് എൻവയൺമെന്റൽ മെഡിസിൻ മേഖലയിലെ നൂതന സാധ്യതകൾ ചർച്ച ചെയ്യുന്ന 'നെംകോൺ 2026' (NEMCON 2026) രാജ്യാന്തര സമ്മേളനത്തിന് ഗോകുലം പാർക്ക് ഹോട്ടലിൽ തുടക്കമായി. ആരോഗ്യരംഗത്ത് എല്ലാക്കാലത്തും കേരളം രാജ്യത്തിന് നേർവഴി കാണിച്ചിട്ടുണ്ടെന്നും പുതിയ ഗവേഷണങ്ങൾ ഈ മേഖലയെ കൂടുതൽ ശക്തിപ്പെടുത്തുമെന്നും സമ്മേളനം ഉദ്ഘാടനം ചെയ്തുകൊണ്ട് മാതൃഭൂമി വൈസ് പ്രസിഡന്റ് (പബ്ലിക് റിലേഷൻസ്) പി.വി. മിനി പ്രസ്താവിച്ചു.

​പൊതുജനങ്ങളെയും ഗവേഷകരെയും ഡോക്ടർമാരെയും ഒരേവേദിയിൽ എത്തിക്കുന്ന കേരളത്തിലെ ആദ്യത്തെ സംരംഭമാണിതെന്ന് സൗഖ്യ ഫൗണ്ടേഷന്റെയും വെൽനെസ് സൊല്യൂഷൻസിന്റെയും സ്ഥാപകനായ ഡോ. എ. ശ്രീകുമാർ ചൂണ്ടിക്കാട്ടി. ആരോഗ്യ സംരക്ഷണത്തിൽ ജീനുകളുടെ പങ്കും ന്യൂട്രീഷ്യണൽ മെഡിസിന്റെ പ്രാധാന്യവും ചർച്ച ചെയ്യുന്ന സമ്മേളനത്തിൽ നടൻ വിജയ്ബാബു, ഷെഫ് നളൻ എന്നിവരും സംസാരിച്ചു. സൗഖ്യ ഫൗണ്ടേഷൻ സംഘടിപ്പിക്കുന്ന ഈ മൂന്ന് ദിവസത്തെ രാജ്യാന്തര സമ്മേളനം മെയ് 31-ന് സമാപിക്കും.

​വെള്ളിയാഴ്ച നടന്ന വിവിധ സെഷനുകളിൽ ഡോ. ഉഷി മോഹൻദാസ്, ആരോഗ്യ സർവകലാശാല വി.സി. ഡോ. മോഹനൻ കുന്നുമ്മൽ, കേന്ദ്ര ശാസ്ത്ര-സാങ്കേതിക മന്ത്രാലയം മുൻ സെക്രട്ടറി പ്രൊഫ. തിരുമലാചാരി രാമസാമി, മലബാർ കാൻസർ സെന്റർ ഡയറക്ടർ ഡോ. സതീശൻ ബി., ബെംഗളൂരു അനാഹിത ഫെർട്ടിലിറ്റി ക്ലിനിക് ഡയറക്ടർ ഡോ. അർവീൻ വോറ, മാഗ്‌ജെനോം സി.ഇ.ഒ. ഡോ. സി.എൻ. രാംചന്ദ്, ഡോ. കെ.എസ്. രംഗപ്ത, ഡോ. സുബിൻ മാറോളിയ, ജോസഫ് ജോൺ വെട്ടുകാട്ടിൽ, ഡോ. ടി.പി. സിങ് തുടങ്ങിയ പ്രമുഖർ വിവിധ വിഷയങ്ങൾ അവതരിപ്പിച്ച് സംസാരിച്ചു. കാൻസർ, പ്രമേഹം, വനിതാ ആരോഗ്യം, പൊതുജന ആരോഗ്യം എന്നിവ മുൻനിർത്തിയുള്ള ശാസ്ത്രീയ പ്രഭാഷണങ്ങളും ചർച്ചകളുമാണ് സമ്മേളനത്തിൽ പ്രധാനമായും നടക്കുന്നത്.