സാധാരണക്കാർക്ക് താങ്ങായി കോർപ്പറേഷന്റെ 'മേയർ കെയർ' പദ്ധതി

തിരുവനന്തപുരം: നിർധനരായ ജനങ്ങൾക്ക് ആവശ്യമായ സഹായങ്ങൾ എത്തിക്കുന്നതിനായി തിരുവനന്തപുരം കോർപ്പറേഷൻ 'മേയർ കെയർ' പദ്ധതി നടപ്പിലാക്കുന്നു. സാധാരണക്കാരായ ജനങ്ങൾക്ക് ആവശ്യമായ സഹായങ്ങൾ കൃത്യമായി ഉറപ്പാക്കുന്ന ഒരു തുടർ-ക്ഷേമ പദ്ധതിയാണിതെന്ന് മേയർ വി.വി. രാജേഷ് വാർത്താസമ്മേളനത്തിൽ അറിയിച്ചു.

​പദ്ധതിയുടെ ആദ്യഘട്ടമായി വിദ്യാഭ്യാസ വകുപ്പിന്റെ സഹകരണത്തോടെ നഗരത്തിലെ സർക്കാർ, എയ്ഡഡ് സ്കൂളുകളിൽ പഠിക്കുന്ന സാമ്പത്തികമായി പിന്നാക്കം നിൽക്കുന്ന 5,050 വിദ്യാർത്ഥികൾക്ക് പഠനോപകരണങ്ങൾ അടങ്ങിയ കിറ്റുകൾ വിതരണം ചെയ്യും. വിവിധ കമ്പനികളുടെ സി.എസ്.ആർ (CSR) ഫണ്ടും മേയറുടെ വ്യക്തിപരമായ ബന്ധങ്ങളും പ്രയോജനപ്പെടുത്തിയാണ് ഈ പഠനക്കിറ്റുകൾ സമാഹരിച്ചിരിക്കുന്നത്. കോർപ്പറേഷൻ ഓപ്പൺ എയർ ഓഡിറ്റോറിയത്തിൽ ശനിയാഴ്ച രാവിലെ 10 മണിക്ക് പഠനക്കിറ്റ് വിതരണത്തിന്റെ ഉദ്ഘാടനം നടക്കും.

​സാമ്പത്തികമായി ബുദ്ധിമുട്ടുന്ന കുടുംബങ്ങളുടെ ചികിത്സ, പാർപ്പിടം, മറ്റ് അടിയന്തര ആവശ്യങ്ങൾ എന്നിവയ്ക്കെല്ലാം ഈ പദ്ധതിയിലൂടെ സഹായം ലഭ്യമാക്കുമെന്ന് മേയർ വ്യക്തമാക്കി. ദിവസങ്ങൾക്ക് മുൻപ് വയനാട് സ്വദേശിയായ ഒരാൾ സഹായം അഭ്യർത്ഥിച്ച് കോർപ്പറേഷനെ സമീപിച്ചിരുന്നുവെന്നും, ഒരു പ്രവാസിയുടെ സ്പോൺസർഷിപ്പോടെ അവർക്ക് വീട് നിർമ്മിച്ച് നൽകാനുള്ള ക്രമീകരണങ്ങൾ പദ്ധതിയുടെ ഭാഗമായി ഇതിനകം തന്നെ ഏർപ്പാടാക്കിയിട്ടുണ്ടെന്നും മേയർ കൂട്ടിച്ചേർത്തു.