പുതിയ കാലത്തിനനുസരിച്ചുള്ള വികസന പാതയിലേക്ക് കേരളത്തെ നയിക്കും: രമേശ് ചെന്നിത്തല

കോട്ടയം : പുതിയ കേരളത്തെ രൂപപ്പെടുത്തുന്നതിനായി തികച്ചും നീതിപൂർവമായ പ്രവർത്തനങ്ങൾ കാഴ്ചവെക്കാൻ സർക്കാർ പ്രതിജ്ഞാബദ്ധമാണെന്ന് ആഭ്യന്തര മന്ത്രി രമേശ് ചെന്നിത്തല വ്യക്തമാക്കി. ഈ ലക്ഷ്യത്തിന്റെ ഭാഗമായി മുടങ്ങിക്കിടക്കുന്ന വിവിധ വികസനപദ്ധതികൾ ഓരോന്നായി പൂർത്തിയാക്കാനുള്ള ഊർജിത ശ്രമങ്ങൾ ഇതിനകം തന്നെ ആരംഭിച്ചതായും അദ്ദേഹം കൂട്ടിച്ചേർത്തു. ദർശന സാംസ്കാരിക കേന്ദ്രത്തിന്റെ ആഭിമുഖ്യത്തിൽ ജനപ്രതിനിധികൾക്കായി സംഘടിപ്പിച്ച പ്രത്യേക സ്വീകരണ സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

​കോട്ടയം സെയ്ന്റ് ജോസഫ് പ്രൊവിൻസ് പ്രൊവിൻഷ്യാൾ ഫാ. സന്തോഷ് മാത്തൻകുന്നേൽ അധ്യക്ഷത വഹിച്ച ചടങ്ങിൽ പ്രമുഖ സാംസ്കാരിക-സാമൂഹിക പ്രവർത്തകർ പങ്കെടുത്തു. ദർശന സാംസ്കാരികകേന്ദ്രം ഡയറക്ടർ ഫാ. ഡോ. തോമസ് പുതുശ്ശേരി, നാദോപാസന പ്രസിഡന്റ് ഡോ. തിരുവിഴ ജയശങ്കർ, ആത്മ പ്രസിഡന്റ് ആർട്ടിസ്റ്റ് സുജാതൻ, മാക്ട ചെയർമാൻ ജോഷി മാത്യു തുടങ്ങിയവർ ചടങ്ങിൽ സന്നിഹിതരായിരുന്നു. വൈ.എം.സി.എ. വൈസ് പ്രസിഡന്റ് അഡ്വ. ടോം കോര അഞ്ചേരിൽ, ഫിൽക്കോസ് പ്രസിഡന്റ് ജിജോ വി. എബ്രഹാം, ഓയിസ്ക പ്രസിഡന്റ് ജെ. ജോസഫ്, കളിയരങ്ങ് പ്രസിഡന്റ് ചന്ദ്രമോഹൻ, ഡ്രീം സെറ്റേഴ്സ് ഡയറക്ടർ എ.പി. തോമസ്, രഞ്ജിനി സംഗീതസഭ ജോയിന്റ് സെക്രട്ടറി കെ.പി. ജോസ്, ഫിൽക്കോസ് ജനറൽ സെക്രട്ടറി പി.കെ. ആനന്ദക്കുട്ടൻ എന്നിവരും സമ്മേളനത്തിന്റെ ഭാഗമായി.

​നാടിന്റെ വികസനത്തിന് കരുത്തുപകരുന്ന ജനപ്രതിനിധികളെ ചടങ്ങിൽ പ്രത്യേകം ആദരിക്കുകയുണ്ടായി. മന്ത്രി മോൻസ് ജോസഫ്, സ്പീക്കർ തിരുവഞ്ചൂർ രാധാകൃഷ്ണൻ എന്നിവർക്കൊപ്പം എം.എൽ.എ.മാരായ ചാണ്ടി ഉമ്മൻ, നാട്ടകം സുരേഷ്, എം.ജെ. സെബാസ്റ്റ്യൻ, കെ. ബിനിമോൻ, വിനു ജോബ് എന്നിവരെയാണ് ദർശന സാംസ്കാരിക കേന്ദ്രത്തിന്റെ നേതൃത്വത്തിൽ വേദിയിൽ ആദരിച്ചത്.