സംസ്ഥാനത്ത് ഐ.എ.എസ്. തലപ്പത്ത് വൻ അഴിച്ചുപണി; രത്തൻ ഖേൽക്കറുടെ നിയമനത്തിനെതിരെ സി.പി.എം

തിരുവനന്തപുരം: പുതിയ യു.ഡി.എഫ് സർക്കാർ അധികാരമേറ്റതിന് പിന്നാലെ സംസ്ഥാനത്തെ ഐ.എ.എസ് ഉദ്യോഗസ്ഥരുടെ തസ്തികകളിൽ വ്യാപകമായ മാറ്റങ്ങൾ വരുത്തി സർക്കാർ ഉത്തരവിറങ്ങി. പാട്ടീൽ അജിത് ഭഗവത് റാവുവിനെ പുതിയ ധനവകുപ്പ് സെക്രട്ടറിയായും പി. ബി നൂഹിനെ ജി.എസ്.ടി കമ്മീഷണറായും നിയമിച്ചു. കെ. ഇമ്പശേഖറിനെ വാട്ടർ അതോറിറ്റി എം.ഡിയായും കണ്ണൂർ കളക്ടറായിരുന്ന അരുൺ കെ. വിജയനെ വ്യവസായ വകുപ്പ് ഡയറക്ടറായും നിയമിച്ചപ്പോൾ, സ്നേഹിൽ കുമാർ സിങ് പുതിയ എൻട്രൻസ് കമ്മീഷണറാകും. ഇതിനൊപ്പം ചീഫ് ഇലക്ടറല്‍ ഓഫീസറായിരുന്ന രത്തൻ ഖേൽക്കറെ മുഖ്യമന്ത്രിയുടെ പുതിയ സെക്രട്ടറിയായി നിയമിച്ചതാണ് നിലവിൽ വലിയ രാഷ്ട്രീയ ചർച്ചകൾക്ക് വഴിവെച്ചിരിക്കുന്നത്.

​രത്തൻ ഖേൽക്കറെ മുഖ്യമന്ത്രിയുടെ സെക്രട്ടറിയാക്കിയ നടപടി നിയമസഭാ തെരഞ്ഞെടുപ്പിന്റെ വിശ്വാസ്യതയെത്തന്നെ ചോദ്യം ചെയ്യുന്നതാണെന്ന് സി.പി.എം സംസ്ഥാന സെക്രട്ടറിയേറ്റ് ശക്തമായി വിമർശിച്ചു. തെരഞ്ഞെടുപ്പ് ഘട്ടത്തിൽ യു.ഡി.എഫിന് വേണ്ടി കമ്മീഷൻ പക്ഷപാതപരമായി ഇടപെട്ടുവെന്ന എൽ.ഡി.എഫിന്റെ മുൻ ആരോപണങ്ങളെ ശരിവെക്കുന്നതാണ് ഈ പെട്ടെന്നുള്ള നിയമനമെന്ന് സി.പി.എം കുറ്റപ്പെടുത്തി. വോട്ടർപട്ടികയിലെ ക്രമക്കേടുകൾ, രാഷ്ട്രീയ പാർട്ടികൾക്കുള്ള കത്തിൽ ബി.ജെ.പിയുടെ സീൽ കണ്ട സംഭവം, എൽ.ഡി.എഫ് സ്ഥാനാർത്ഥികളുടെ ചിഹ്നങ്ങളിലെ വ്യക്തതക്കുറവ്, ഉദ്യോഗസ്ഥരുടെ വോട്ടവകാശം നിഷേധിക്കപ്പെടൽ, വോട്ടിംഗ് ശതമാനം പുറത്തുവിടുന്നതിലെ കാലതാമസം തുടങ്ങിയ ഗുരുതരമായ വീഴ്ചകൾ തെരഞ്ഞെടുപ്പ് പ്രക്രിയയിൽ ഉണ്ടായിട്ടുണ്ടെന്നും ഇതിനെല്ലാം പിന്നിൽ വ്യക്തമായ ഒത്തുകളിയുണ്ടെന്നും ഇടതുപക്ഷം ആരോപിക്കുന്നു.

​മുമ്പ് പശ്ചിമ ബംഗാളിൽ തെരഞ്ഞെടുപ്പിന് തൊട്ടുപിന്നാലെ ചീഫ് ഇലക്ഷൻ ഓഫീസറെ ചീഫ് സെക്രട്ടറിയായും മറ്റും നിയമിച്ചപ്പോൾ അതിനെതിരെ 'ലജ്ജയില്ലാത്ത ഒത്തുകളി' എന്ന് വിമർശിച്ച രാഹുൽ ഗാന്ധിയും എ.ഐ.സി.സിയും, കേരളത്തിൽ നടന്ന സമാനമായ ഈ നിയമനത്തെ എങ്ങനെ ന്യായീകരിക്കുമെന്ന് വ്യക്തമാക്കണമെന്നും സി.പി.എം ആവശ്യപ്പെട്ടു. ഇത്തരം നിർണായക പദവികളിലിരിക്കുന്ന ഉദ്യോഗസ്ഥർക്ക് തെരഞ്ഞെടുപ്പ് കഴിഞ്ഞയുടൻ പുതിയ സർക്കാരിന് കീഴിൽ ഉന്നത പദവികൾ നൽകുന്നതിന് 'കൂളിംഗ് ഓഫ് പിരീഡ്' ഏർപ്പെടുത്തണമെന്ന കോൺഗ്രസിന്റെ ദേശീയ നിലപാടിന് വിരുദ്ധമാണ് കേരളത്തിലെ ഈ നടപടിയെന്നും, തെരഞ്ഞെടുപ്പ് കമ്മീഷന്റെ നിഷ്പക്ഷത തകർക്കുന്ന കേന്ദ്ര-സംസ്ഥാന സർക്കാരുകളുടെ ഇടപെടലുകൾക്കെതിരെ ശക്തമായ പ്രതിഷേധം രേഖപ്പെടുത്തുന്നതായും സി.പി.എം പ്രസ്താവനയിലൂടെ അറിയിച്ചു.