മാധ്യമങ്ങളിലെ തലക്കെട്ടുകൾക്കായി വാഗ്ദാനങ്ങൾ നൽകില്ലെന്ന് മന്ത്രി ഒ.ജെ. ജനീഷ്

തിരുവനന്തപുരം: മാധ്യമങ്ങളിൽ വലിയ തലക്കെട്ടുകൾ സൃഷ്ടിക്കാൻ വേണ്ടി മാത്രം താൻ പൊള്ളയായ വാഗ്ദാനങ്ങൾ നൽകില്ലെന്ന് മന്ത്രി ഒ.ജെ. ജനീഷ് വ്യക്തമാക്കി. തിരുവനന്തപുരം പ്രസ് ക്ലബ്ബിന്റെ കുട്ടിക്കൂട്ടം പരിപാടി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മുൻപ് കേരളത്തിൽ അർജന്റീനൻ ഫുട്ബോൾ താരം മെസി വരുമെന്ന് ചിലർ വാഗ്ദാനം നൽകിയതുപോലെയുള്ള നിലപാടുകൾ തന്റെ ഭാഗത്തുനിന്ന് ഉണ്ടാകില്ലെന്നും അദ്ദേഹം കൂട്ടിച്ചേർത്തു. കുട്ടികളിലെ ഡിജിറ്റൽ ആസക്തി പൂർണ്ണമായും ഒഴിവാക്കാനുള്ള കർശന ശ്രമങ്ങൾ നടത്തുമെന്നും യുവജനങ്ങൾക്കായി വ്യത്യസ്തമായ പുതിയ ആശയങ്ങൾ നടപ്പിലാക്കാൻ ആവശ്യമായ കാര്യങ്ങൾ ചെയ്യുമെന്നും മന്ത്രി ചടങ്ങിൽ പറഞ്ഞു.

​പ്രസ് ക്ലബ്ബ് പ്രസിഡന്റ് എസ്. ശ്രീകേഷ് അധ്യക്ഷത വഹിച്ച ചടങ്ങിൽ പ്രമുഖ നടൻ ജിബിൻ ഗോപിനാഥ് മുഖ്യാതിഥിയായി പങ്കെടുത്തു. കുട്ടികൾക്കുള്ള പഠനസാമഗ്രികളുടെ വിതരണോദ്ഘാടനവും ചടങ്ങിൽ വെച്ച് അദ്ദേഹം നിർവഹിച്ചു. പരിപാടിയിൽ പ്രസ് ക്ലബ്ബ് സെക്രട്ടറി പി.ആർ. പ്രവീൺ, ട്രഷറർ വി. വിനീഷ് എന്നിവരും ആശംസകൾ അർപ്പിച്ചു സംസാരിച്ചു.